«Inšyja kandydaty nie majuć takoj mahčymaści». U Litvie Naŭsiedu raskrytykavali za toje, što jon abviaściŭ pra druhi termin, sklikaŭšy žurnalistaŭ u Prezidencki pałac
Učora Hitanas Naŭsieda abviaściŭ, što idzie na druhi prezidencki termin. Zdavałasia b, šarahovaja padzieja, ale jana ŭźniała chvalu krytyki.
Rašeńnie prezidenta Hitanasa Naŭsiedy abviaścić u Prezidenckim pałacy pra svoj udzieł u prezidenckich vybarach u nastupnym hodzie vyklikała ździŭleńnie ŭ parłamientaryjaŭ. Palityki sumniavajucca, ci nie vyčarpaŭ kiraŭnik dziaržavy, jaki pretenduje na druhi termin, najaŭnyja resursy prezidenckaj ustanovy, zadajecca pytańniem Delfi.lt.
Tak, eks-premjer Saŭlus Skviarnialis, jaki bałatavaŭsia ŭ prezidenty ŭ 2019 hodzie, zajaviŭ, što abviaščeńnie ab vyłučeńni ŭ Prezidenckim pałacy z praviadzieńniem śpiecyjalnaj kanfierencyi z hetaj nahody parušaje pryncyp roŭnaści.
«Heta naturalnaje vykarystańnie prezidenckich resursaŭ padčas vybarčaj kampanii. Napeŭna, u nivodnaha inšaha kandydata niama mahčymaści pryjści ŭ prezidencki pałac, pravieści tam pres-kanfierencyju i zajavić pra siabie», — prakamientavaŭ Skviarnialis.
Pradstaŭnik kansiervataraŭ Radvile Markunajcie-Mikulenienie taksama z padazreńniem stavicca da pres-kanfierencyi, arhanizavanaj u Prezidenckim pałacy.
«Niezaležna ad hetaha, varta acanić, što možna źmianić, kab tyja resursy, jakija vydzielenyja na pasadu prezidenta, byli vyklučanyja. I mnie dziŭna, što prezident zamiest taho, kab havaryć pra siabie, pierakidaje pytańni svaim kankurentam», — razvažała parłamientaryj, adznačyŭšy, što ŭ Naŭsiedy było bolš alternatyŭ dla apublikavańnia rašeńnia ŭ čaćvier.
«Heta vybar prezidenta, choć, na moj pohlad, možna było znajści i inšyja šlachi», — padsumavała R.Markunajcie-Mikulenienie.
Prezidenckija vybary ŭ Litvie pavinny prajści ŭ mai 2024 hoda. 59-hadovamu Naŭsiedu buduć supraćstajać niekalki kandydataŭ, najbolš mocnyja supierniki heta premjer Inhryda Šymanicie i advakat Ihnas Viehiele.
U najnoŭšaj historyi Litvy dva prezidenckija terminy zajmali pasadu Vałdas Adamkus (1998—2003, 2004—2009) i Dala Hrybaŭskajcie (2009—2019), u 1926—1940 hadach prezidentam byŭ Antanas Śmiatona, jaki byŭ i pieršym prezidentam mižvajennaj Litvy (1919—1920).
Kamientary