Łuŭr zapłaciŭ dziasiatki miljonaŭ jeŭra za karcinu, jakuju źbiralisia vykinuć u śmietnicu
Pažyłaja francužanka prybirałasia ŭ svaim domie i znajšła staruju karcinu, jakuju zachacieła vykinuć. Ciapier hety tvor mastactva byŭ vykupleny paryžskim muziejem za vialikija hrošy. Raskazvajem, što za jon i čamu jaho paličyli takim kaštoŭnym.
Karcina viadomaha fłarentyjskaha mastaka Čymabue «Aśmiejvańnie Chrysta» doŭhi čas ličyłasia źnikłaj. Adnak u 2019 hodzie jana była adkryta iznoŭ, kali pažyłaja francužanka znajšła karcinu ŭ siabie na kuchni i spačatku chacieła vykinuć u śmiećcie, ale ŭsio ž pryniesła jaje śpiecyjalistam na pravierku. Ab hetaj historyi piša vydańnie The Guardian.
Paśla taho, jak žančyna pryniesła ekśpiertam svaju znachodku, było vyrašana pakazać jaje prafiesijnym mastactvaznaŭcam u Paryžy. Tady mierkavałasia, što praca moža kaštavać 400 tysiač jeŭra.
Ale paryžskija mastactvaznaŭcy zajavili, što byŭ znojdzieny mienavita aryhinał karciny i jon budzie kaštavać značna bolš.
Tady pradstaŭniki Łuŭra vyrašyli prykłaści ŭsie namahańni dla taho, kab nabyć «Aśmiejvańnie Chrysta» sabie ŭ kalekcyju. Čakałasia, što heta budzie adzin z najstarejšych tvoraŭ epochi Reniesansu ŭ paryžskim muziei.
«Łuŭr patraciŭ 4 hady na atrymańnie karciny sabie. Pradstaŭniki muzieja spadziavalisia vykupić jaje na aŭkcyjonie, na jakim tvor spačatku aceńvali ad 4 da 6 miljonaŭ jeŭra. Muziej, adnak, nie zdoleŭ heta zrabić, bo «Aśmiejvańnie Chrysta» vykupili za 19,5 miljonaŭ, a ahulny košt karciny skłaŭ 24 miljony», — raspaviadaje The Guardian.
Tady ministerstva kultury Francyi abviaściła karcinu «nacyjanalnym zdabytkam» i zabaraniła vyvozić jaje z terytoryi krainy. Łuŭr atrymaŭ 30 miesiacaŭ na zbor nieabchodnych srodkaŭ dla nabyćcia tvora Čymabue.
Pry hetym ni Łuŭr, ni ministerstva kultury potym aficyjna nie paviedamlali, za kolki dakładna była nabyta karcina i jakim čynam na jaje znajšli hrošy. Adnak viadoma, što jany źbirali danaty i zaachvočvali miecenataŭ achviaravać hrošy, za što abiacali im dadatkovyja padatkavyja ilhoty, adznačaje The Guardian.
Karcina aŭtarstva fłarentyjskaha mastaka Džavani Čeni dzi Piepa (bolš viadomaha pad proźviščam Čymabue) była napisana ŭ 1280 hodzie. Miarkujecca, što heta tolki adna z vaśmi častak palipcicha Čymabue, piać ź jakich usio jašče ličacca zhublenymi.
«Aśmiejvańnie Chrysta» nie vielmi vialikaja pa pamiery: usiaho 25 na 20 santymietraŭ. Jana maje załaty fon, na jakim adlustravanyja ździeki ź Isusa Chrystom pierad jahonym raśpinańniem na Hałhofie.
Sam Čymabue naradziŭsia ŭ 1240 hodzie va Fłarencyi i pamior u 1302 hodzie ŭ Pizie. Mastactvaznaŭcy prypisvajuć jamu navučańnie hienijalnaha architektara i žyvapisca Džota dzi Bandone, jaki staŭ bolš viadomym za svajho nastaŭnika i kim paśla natchnialisia Leanarda Da Vinčy, Rafael Sanci i Mikiełandžeła Buanaroci.
A žančyna, na čyjoj kuchni znachodziłasia «Aśmiejvańnie Chrysta», na žal, nie dačakałasia atrymańnia takoj vialikaj sumy za svaju znachodku. Jana pamierła va ŭzroście 90 hadoŭ praz 2 dni paśla aŭkcyjonu.
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal7
Kamientary