Žycharka Varšavy ŭratavała 26-hadovaha biełarusa, jaki apynuŭsia na vulicy pad praliŭnym daždžom i ničoha nie pamiataŭ
Žycharka Varšavy Roza Cybulska raspaviała na svajoj staroncy ŭ fejsbuku, jak rankam u minułuju niadzielu vyratavała maładoha biełarusa: napaŭhoły chłopiec stajaŭ pasiarod darohi pad praliŭnym daždžom, dryžaŭ i nie moh havaryć. Jana vyklikała chutkuju, a potym jašče j pierakonvała daktaroŭ, što čałavieku patrebnaja dapamoha. Pani Roza dahetul nie viedaje, kaho jana vyratavała: «U chłopca retrahradnaja amniezija, jon ničoha nie pamiataje z toj nočy, aprača taho, što byŭ u kłubie».
U supołkach varšaŭskich biełarusaŭ u fejsbuku aktyŭna abmiarkoŭvajuć hety vypadak. Udzielniki prosiać paviedamić imia i proźvišča paciarpiełaha, kali niechta zaŭvažyć, što chtości sa znajomych nie viarnuŭsia dachaty, nie pryjšoŭ na vučobu abo na pracu.
A taksama zhadvajuć, što ŭžo sustrakalisia ŭ Varšavie z padobnymi vypadkami — kali ludzi paśla naviedvańnia kłubaŭ apynajucca ŭ nieznajomych miaścinach, biez hrošaj, mabilnaha telefona i dakumientaŭ. U kamientarach hučać parady «nie złoŭžyvać ałkaholem i narkotykami» i być aściarožniej z kaktejlami — «brać zakarkavanyja napoi, kab nichto ničoha nie padmiašaŭ».
Roza Cybulska ŭpeŭnienaja, što chłopiec nie vyhladaŭ tak, nibyta prosta «pierabraŭ». Kali jana ŭbačyła jaho niepadalok ad svajho doma, to viarnułasia ź im u padjezd, paprasiła kanśjeržku vyklikać chutkuju, źniała ź jaho mokraje adzieńnie i addała svajo, a nohi nakryła vyratavalnaj termakoŭdraj.
Kali stan chłopca pačaŭ palapšacca, jon zdoleŭ skazać, što jon ź Biełarusi i što jamu 26 hadoŭ.
Žycharku Varšavy niepryjemna ŭraziła, što daktary chutkaj, jakaja prybyła praz 25 chvilin, pastavilisia da chłopca biez naležnaj uvahi. «Jany skazali, što jahonamu žyćciu ničoha nie pahražaje. I mnie daviałosia pierakonvać ich, što vielmi ryzykoŭna pakidać čałavieka ŭ takim stanie biez dahladu. Prysłuchalisia ž da mianie tolki tady, kali ja skazała, što maju miedyčnuju adukacyju. Chłopca zabrali ŭ mašynu, ale navat nie prapanavali koŭdry, kab sahrecca».
Za spačuvańnie i nieabyjakavaść Rozie Cybulskaj dziakujuć i palaki, i biełarusy. «Pani ma serce Jezusa», — napisała polskaja dziaŭčyna.
Ciapier čytajuć
Hety biełarus daśleduje rak — voś što jon kaža pra SPF ad miełanomy, navukovy prahres i samy składany ŭ lačeńni rak3
Kamientary