Žurnalist śćviardžaje, što futbalist moładzievaj zbornaj pabiŭsia i trapiŭ u balnicu ŭ Partuhalii. Žonka abviarhaje
13 kastryčnika «maładziožka» prajhrała partuhalcam ź likam 1:6. Ale samaje cikavaje, miarkujučy pa ŭsim, adbyłosia paśla razhromu.
Jak napisaŭ žurnalist i insajdar Uład Tatur, paśla parazy hulec biełaruskaj zbornaj Rusłan Lisakovič parušyŭ režym i ŭlez u bojku. Pa źviestkach Tatura, usio skončyłasia nie vielmi dobra, i biełarus trapiŭ u balnicu.
Pa niekatorych źviestkach, Lisakovič apynuŭsia nie prosta ŭ balnicy, a ŭ reanimacyi.
Žurnalist paśla dadaŭ, što Lisakovič u vyniku kanfliktu atrymaŭ surjoznyja paškodžańni i pa-raniejšamu znachodzicca pad kantrolem miedykaŭ u Partuhalii. Z hulcom znachodzicca kiraŭnik delehacyi Dźmitryj Kasianok.
«Režym parušyŭ nie tolki Lisakovič. Voś takaja ŭ nas moładzievaja zbornaja», — narakaje Tatur.
Na nastupny matč suprać Charvatyi Lisakovič u zajaŭku kamandy nie trapiŭ.
Žonka futbalista Ksienija abviarhaje infarmacyju pra bojku i špitalizacyju.
«Heta ŭsio niapraŭda, i ja ščyra nie razumieju, kamu nie dahadziŭ Rusłan, kab pisać naviny ŭzroŭniu žoŭtaj presy. Ź Lisam usio dobra», — cytuje Ksieniju «Trybuna».
Rusłanu Lisakoviču 21 hod, jon hulaje za «Dynama» z Machačkały (druhi rasijski dyvizijon). Jon ličycca adnym z najbolš talenavitych maładych hulcoŭ Biełarusi. Debiutavaŭ za nacyjanalnuju zbornuju raniej za moładzievuju. Jahonyja starejšyja braty Vital i Dźmitryj taksama futbalisty.
Pavietranaja himnastka pakazała zakuliśsie pracy ŭ Biełdziaržcyrku7
Kamientary