Ekśpierty vyjavili imaviernyja šlachi pastavak zbroi z KNDR u Rasiju
KNDR, vierahodna, naładziła maršrut pastavak bojeprypasaŭ u Rasiju. Takuju vysnovu zrabili ekśpierty brytanskaha Karaleŭskaha instytuta abaronnych daśledavańniaŭ (RUSI) na asnovie spadarožnikavych zdymkaŭ, zroblenych u apošnija miesiacy nad bazaj Cichaakijanskaha fłotu RF u Fokinie ŭ Prymorskim krai i paŭnočnakarejskim portam Rason, piša «Mieduza».
U pryvatnaści, RUSI ustanaviŭ, što ŭ žniŭni i vieraśni pamiž Fokinam i Rasonam pačali kursiravać dva rasijskija karabli — suchahruzy «Anhara» i «Maryja». Za hety čas, jak śćviardžajecca, jany pieravieźli sotni kantejnieraŭ, chavajučy ŭłasnuju hieałakacyju.
Kančatkovym punktam, miarkujuć analityki, moh stać skład bojeprypasaŭ u Cicharecku Krasnadarskaha kraja, jaki raźmieščany ŭsiaho za 200 kiłamietraŭ ad rasijska-ŭkrainskaj miažy. Takuju vysnovu ekśpierty zrabili, vyvučyŭšy zdymki ad 28 vieraśnia, na jakich kantejniery ŭ Krasnadarskim krai identyčnyja tym, što raniej bačyli ŭ KNDR i ŭ Prymorskim krai.
Vyznačyć, što mienavita znachodzicca ŭ kantejnierach, pa adnych spadarožnikavych zdymkach niemahčyma, adznačajuć u RUSI. Adnak u piatnicu pradstaŭnik Rady nacyjanalnaj biaśpieki Džon Kirbi taksama pakazaŭ spadarožnikavyja zdymki i zajaviŭ, što ZŠA vałodaje danymi ab pastaŭkach uzbrajeńnia Paŭnočnaj Karei ŭ Rasiju.
U vieraśni pastaŭki vajskovaj techniki nazyvali hałoŭnaj temaj pieramovaŭ Kim Čen Yna padčas jahonaha vizitu ŭ Rasiju.
Ciapier čytajuć
Pamierła 39-hadovaja eks-palitźniavolenaja Hanna Kandracienka. U kałonii ŭ jaje znajšli rak, ale nie vyzvalili27
Kamientary
Kakije žie vy tvari...