Čeračań: Biez Łukašenki my možam być uciahnutyja ŭ surjoznyja razborki
Eks-kandydat u prezidenty na vybarach 2020 hoda, lidar likvidavanaj Biełaruskaj sacyjał-demakratyčnaj Hramady Siarhiej Čeračań ličyć, što ciapier u krainie składanaja situacyja.
«La našych miežaŭ idzie vajna. Biełaruś adčuvaje vielmi mocny cisk z boku kalektyŭnaha Zachadu. Jość surjoznaja aściaroha, što biez Łukašenki ŭ hety momant my akažamsia ŭciahnutymi ŭ surjoznyja razborki, i situacyju nie atrymajecca ŭtrymać navat na tym uzroŭni napružańnia, jakoje isnuje ciapier», — cytuje jaho «Narodnaja Vola».
Siarhiej Čeračań miarkuje, što ludzi siońnia nie hatovyja ryzykavać (vychodzić na pratesty). Ale narmalnaja palityka i ekanomika adnaznačna patrebnyja.
«U parłamiencie patrebnaja alternatyva, navat u adzinkavym ekzemplary. Ale pieradumovy, što ŭłada hatovaja da hetaha, adsutničajuć», — kaža biznesoviec-palityk.
Jon taksama nie bačyć ryzyki vajennaj pahrozy dla Biełarusi z boku Polščy, krain Bałtyi.
«Paśla situacyi va Ukrainie ja ŭžo nie mahu adnaznačna adkazać na hetaje pytańnie, ale, na moj pohlad, ryzyka adsutničaje jak z boku krain Bałtyi, Polščy, tak i z boku Biełarusi. Usie pracesy vyklučna palityčnyja i nie majuć dačynieńnia da realnaj vajennaj pahrozy», — miarkuje jon.
Siarhiej Čeračań taksama nie vieryć u poŭnaje zakryćcio miežaŭ.
«Poŭnaha zakryćcia miežaŭ nie budzie. Ale sumna toje, što takim čynam ułady našych susiednich krain u pieršuju čarhu adasablajucca ad zvyčajnych biełarusaŭ. Abmiežavać pierasoŭvańnie dla ŭsich — zališnie pakazalnaja miera», — padsumavaŭ eks-kandydat u prezidenty.
Kamientary