Siarhiej Čeračań zajaviŭ, što budzie ŭdzielničać u prezidenckich vybarach 2025 hoda
Staršynia partyi «Biełaruskaja sacyjał-demakratyčnaja hramada», biznesmien i eks-kandydat u prezidenty 2020 hoda raskazaŭ «Narodnaj Voli» pra pierarehistracyju svajoj palityčnaj arhanizacyi, prezidenckija ambicyi i staŭleńnie da tych, chto ličyć jaho «padstaŭnoj fihuraj».
«Asabista ŭ mianie zachoŭvajucca žadańnie i siły vyłučać svaju kandydaturu na budučych prezidenckich vybarach. Ja i maja kamanda šmat času i sił patracili na toje, kab pradstaŭlać intaresy našych vybarščykaŭ na palityčnym poli», — kaža Siarhiej Čeračań.
Razam z tym jon kaža, što pierśpiektyŭ paŭpłyvać na niejkija palityčnyja pracesy niama.
«Ale ja kažu pra doŭhaterminovuju pierśpiektyvu. Spadziajusia, što pieramieny ŭ krainie kaliści buduć. Heta pytańnie času. I da hetaha treba rychtavacca. Kali apuścić ruki ciapier, to chto budzie vieści za ruku novych chłopcaŭ, u jakich šmat inicyjatyŭ? Kali ŭsie źjeduć z krainy, to dakładna ničoha dobraha nie budzie», — kaža palityk.
Jon zaznačaje, što partyja padała ŭ Miniust dakumienty na rehistracyju biez pajmiennaha śpisa siabroŭ partyi, bo heta vialikaja ryzyka dla ludziej, kali ich piersanalnyja danyja buduć u rukach uładaŭ. Miž inšym, u partyi ciapier 5180 siabroŭ.
Tym nie mienš jon upeŭnieny na 99 pracentaŭ, što Viarchoŭny sud partyju likviduje.
Adkazaŭ Čeračań i na zakidy, što jon i jaho partyja hulajuć pa praviłach ułady.
«Ja hulaju pa peŭnych praviłach, bo ŭ našaj krainie jość čyrvonyja linii (asabliva paśla 2020 hoda), jakija pierachodzić nielha. Tak, asabliva nie leziem na ražon, ale hetaha i nie admaŭlajem. Usie my vydatna razumiejem, što kali b ja ciapier vykazvaŭ toj punkt hledžańnia, jakoha prytrymlivajucca našy kalehi, jakija źjechali na Zachad, to ŭžo daŭno siadzieŭ by ŭ turmie. Albo pryjšłosia b źjazdžać za miažu ŭ bahažniku mašyny. Ale heta nie kaža, što ja pry ŭsioj majoj aściarožnaści nie pradstaŭlaju intaresy svaich ludziej», — kaža kiraŭnik partyi.
***
Na vybarach 2020 hoda Siarhiej Čeračań, pavodle źviestak CVK, nabraŭ 1,14%. Zrešty Cichanoŭskaj CVK tady napisaŭ 10,14%, choć pavodle vynikaŭ płatformy «Hołas» i niezaležnych ekzit-połaŭ jana pieramahła, i falsifikacyja vynikaŭ vybaraŭ vyklikała masavyja pratesty.
U Hanny Kanapackaj, pavodle aficyjnych źviestak, było 1,68%, u Andreja Dźmitryjeva — 1,21%.
Viktara Babaryku, jaki zajaviŭ pra ŭdzieł u vybarach, zatrymali razam z synam 18 červienia, da vybaraŭ nie dapuścili, a praz hod asudzili da 14 hadoŭ źniavoleńnia.
Valeryj Capkała byŭ vymušany ź siamjoj źjechać. Zajaŭlaŭ pra ŭdzieł u vybarach Siarhiej Cichanoŭski, ale jaho hrupu nie zarehistravali, 29 maja 2020 hoda zatrymali i praz paŭtara hoda dali 18 hadoŭ kałonii. Jaho žonka, Śviatłana Cichanoŭskaja, jakaja faktyčna stała adzinym kandydatam, vymušana była pakinuć krainu.
Zajaŭlali pra ŭdzieł u vybarach Volha Kavalkova, Mikałaj Kazłoŭ, Uładzimir Niapomniaščych, Juraś Hubarevič, Aleś Tabolič, ale jany abo źnialisia z honki, abo nie zdavali podpisy.
U vyniku Kavalkova, Hubarevič, Tabolič apynulisia ŭ emihracyi, Niapomniaščych i Kazłoŭ — za kratami.
U studzieni 2023 hoda pryjšli pa Andreja Dźmitryjeva. Praź niekalki miesiacaŭ jamu dali paŭtara hoda kałonii.
Ciapier čytajuć
U Pskovie rasijanin zabiŭ biełarusa Valeryja za toje, što toj patrabavaŭ pavažać biełaruskuju nacyju12
Kamientary