Rasija ŭdaryła pa dramteatry Čarnihava, kali tam prachodziła vystava vytvorcaŭ dronaŭ
Jość zahinułyja i paranienyja.
U budynku dramteatra prachodziła vystava vytvorcaŭ dronaŭ.
U vyniku rakietnaha ŭdaru zahinuła 6 čałaviek. U tym liku šaścihadovaja dziaŭčynka, jakuju sprabavali vyratavać rabotniki ratavalnaj słužby. Jaje mama znachodzicca ŭ balnicy ŭ ciažkim stanie.
Traŭmy atrymali 42 čałavieki, siarod jakich 11 dziaciej, paviedamiŭ kiraŭnik MUS Ukrainy Ihar Klimienka.
Paviedamlajecca, što praciŭnik moh nanieści ŭdar pa abłasnym centry z apieratyŭna-taktyčnaha rakietnaha kompleksu «Iskander». Pavietranaja tryvoha ŭ Čarnihaŭskaj vobłaści 19 žniŭnia była abvieščanaja ŭ 11:20. Adboj tryvohi byŭ u 12:24.
Uładzimir Zialenski apieratyŭna prakamientavaŭ udar pa Čarnihavie.
«Voś što takoje susiedstva z terarystyčnaj dziaržavaj, voś suprać čaho my abjadnoŭvajem uvieś śviet. Rasijskaja rakieta trapiła prosta ŭ centr horada, u naš Čarnihaŭ.
Płošča, Palitechnika, Teatr. Zvyčajny subotni dzień, jaki Rasija pieratvaryła ŭ dzień bolu i strat. Jość zahinułyja, jość paranienyja.
Maje spačuvańni tym, chto straciŭ rodnych … usie słužby pracujuć na miescy: ratavalniki, palicyja, miedyki. Kožny, chto patrebny.
Zrobim jašče bolš dla kansalidacyi śvietu suprać rasijskaha teroru. Damo jašče bolš našaj dziaržavie dla abarony žyćcia. Rasija pavinna prajhrać u hetaj vajnie, kab žyćcio atrymała pieramohu», — napisaŭ u svaim telehramie Uładzimir Zialenski, jaki siońnia znachodzicca ź vizitam u Šviecyi.
Kamientary