Kankurenty «Biełaruśkalija» aceńvajuć źnižeńnie jaho pastavak na ekspart napałovu
Kampanii Nutrien i Mosaic, asnoŭnyja paŭnočnaamierykanskija kankurenty «Biełaruśkalija», apublikavali kvartalnyja spravazdačy. U ich utrymlivajecca acenka pastavak kalijnych uhnajeńniaŭ ź Biełarusi ŭ 2023 hodzie, piša Reform.by.
Mosaic prahnazuje, što adhruzki biełaruskich kalijnych uhnajeńniaŭ sioleta buduć na 5—6 młn ton mienšyja, čym u dasankcyjny pieryjad. Nutrien aceńvaje źnižeńnie biełaruskich pastavak u 4—5 młn ton u paraŭnańni z 2021 hodam. Ekspart z RF skarocicca na 3—4 młn ton u paraŭnańni z tym ža hodam.
U siaredzinie lipienia pieršy vice-premjer biełaruskaha ŭrada Mikałaj Snapkoŭ zajaŭlaŭ, što Biełaruś sioleta maje namier pradać 8 młn ton kalijnych uhnajeńniaŭ. Z pačatku hoda ŭdałosia ekspartavać praz terminały Sankt-Pieciarburha 2,7 młn ton.
Zvyčajna Biełaruś ekspartavała 10—12 młn ton kalijnych uhnajeńniaŭ.
Nutrien u svajoj spravazdačy taksama źniziła prahnoz suśvietnych pastavak kaliju ŭ hetym hodzie da 63—65 młn ton. Kampanija adznačaje, što budzie adčuvać ciažkaści z ekspartam praz zabastoŭki ŭ porcie Vankuviera.
Jana taksama źviartaje ŭvahu na źnižeńnie suśvietnych cen na kalij u druhim kvartale na fonie zatrymki z zaklučeńniem kitajskaha kantrakta. Treba adznačyć, što BKK nazvała canu, jakuju atrymaŭ kanadski trejdar, jakaja nie adpaviadaje rynkavaj situacyi. U trecim kvartale kanadcy čakajuć rostu popytu na ŭhnajeńni pa miery vyčarpańnia zapasaŭ u pakupnikoŭ.
Razam z tym Nutrien zajaviła ab rašeńni abmiežavać svoj hadavy abjom vytvorčaści kalijnych uhnajeńniaŭ da 18 młn ton u jakaści adkazu na rynkavyja ŭmovy.
Pavodle spravazdačy kampanii, u pieršym paŭhodździ jana adhruziła krychu bolš za 6 młn ton uhnajeńniaŭ, što na 11% mienš, čym letaś. Pry hetym vyručka ad prodažu skaraciłasia na 45% da 2,01 młrd dalaraŭ. Siaredni košt tony kaliju ŭpaŭ udvaja ŭ paraŭnańni ź minułym hodam — da 334 dalaraŭ.
Mosaic u svajoj spravazdačy taksama kanstatuje źnižeńnie cen na kalijnyja ŭhnajeńni. Prodaž kampanii za druhi kvartał skłaŭ 849 młn dalaraŭ suprać 1,6 młrd dalaraŭ letaś. Pry hetym u naturalnym vyražeńni zbyt kalijnych uhnajeńniaŭ źniziŭsia ŭsiaho na 0,1 młn ton da 2,2 młn ton. Siaredniaja marža na tonie kaliju skaraciłasia za hod z 403 da 155 dalaraŭ.
Kamientary