Stała viadoma, kolki kaštuje tranzit biełaruskich hruzaŭ praz Rasiju
Kali sankcyi «zakryli» dla biełaruskich tavaraŭ party na Bałtycy i adpaŭ ukrainski maršrut, ekspartny patok nakiravaŭsia va ŭschodnim kirunku. Ale pa daŭžejšych i daražejšych šlachach.
Bolšaja častka vydatkaŭ na ekspart biełaruskich hruzaŭ praz Rasiju — heta apłata pieravozki pa čyhuncy. Jak raspavioŭ pieršy namieśnik ministra transpartu i kamunikacyj Alaksiej Lachnovič, jana składaje kala 60%, piša Tochka.by.
«Heta asnoŭnaja častka vydatkaŭ. Plus pieravałka ŭ porcie: dzieści nam prapanujuć pa 6 dalaraŭ za tonu, dzieści pa 20 dalaraŭ, zrazumieła, što my viaziem tudy, dzie tańniej», — raspavioŭ čynoŭnik u teleintervju.
Murmansk — tolki ŭ płanach
Pavodle jaho słoŭ, siońnia dla pieravałki biełaruskich hruzaŭ zadziejničana 19 partoŭ.
«Heta i kalidor «Poŭnač-Poŭdzień», u bok Astrachani, i party Sankt-Pieciarburha, Čornaha i Azoŭskaha moraŭ. Akramia ŭsiaho inšaha my pieravozim hruzy i pa suchaputnym maršrucie ŭ bok Kitaja», — adznačyŭ Lachnovič.
Jak zajaviŭ čynoŭnik, u pieršym paŭhodździ abjom biełaruskich hruzaŭ, jakija iduć praz rasijskija party, skłaŭ 6 młn ton i kala 1,5 młn ton — pa sušy ŭ Kitaj.
«Z ulikam taho, što bližej za ŭsio da nas party Sankt-Pieciarburha, bolš za ŭsio hruzaŭ idzie praź ich. Jany pieravažajuć jak pa abjomach, tak i pa taryfach: vielmi karotkaja čyhunačnaja adlehłaść, plus pa asobnych vidach hruzaŭ my atrymali źnižku na Bałtyku, tamu jana siońnia pa-za kankurencyjaj», — raspavioŭ namieśnik ministra.
Pavodle jaho, razhladajecca taksama paŭnočny kirunak — party Murmanska. Hetaje pytańnie budzie adpracoŭvacca z rasijskimi kalehami.
Taksama varta ŭličvać, što transpartnaje plačo rezka pavialičyłasia: kali ad Salihorska da Kłajpiedy 612 km, to pry adhruzcy ŭ porcie Murmanska pryjdziecca haniać sastavy na 2255 km — amal u čatyry razy dalej.
«Asnoŭnaje — chutkaja akupnaść. Kali my budziem bačyć, što košt pieravałki nas zadavalniaje praź niejki terminał abo rehijon, plus prajekt chutka akupny, u płyni 5-7 hadoŭ, viadoma, hulnia varta śviečak», — dadaŭ umovy budaŭnictva porta (terminała) ŭ Rasii čynoŭnik.
Kamientary