«Kožnuju ranicu čytaje Bibliju na biełaruskaj movie». Jak trymajecca ŭ SIZA Andrej Dźmitryjeŭ
Minski haradski sud u piatnicu razhledzieŭ apielacyjnuju skarhu na prysud, vyniesieny palityku, lidaru likvidavanaj partyi «Havary praŭdu» Andreju Dźmitryjevu.
Sudździa Anžeła Kaściukievič pastanaviła pakinuć prysud, vyniesieny 6 krasavika, u sile i bieź źmienaŭ. Palityk pavinien budzie adbyć paŭtara hoda pazbaŭleńnia voli za svoj udzieł u pratestach.
Ciapier, kali apielacyja razhledžanaja, Andreja Dźmitryjeva pavinny nieŭzabavie pieravieści ŭ kałoniju. Užo amal paŭhoda jon znachodzicca ŭ SIZA-1 Minska.
«Ranica pačynajecca ź Biblii na biełaruskaj movie. Vučycca malavać, pisać levaj rukoj. Čytaje adnu knihu na tydzień. Prachodzić kala 8000 krokaŭ u dzień», — raskazali «Lusterku» jaho blizkija.
Nahadajem, Dźmitryjeva zatrymali 11 studzienia i abvinavacili va ŭdziele ŭ pratestach paśla vybaraŭ 2020 hoda. U dadatak da hetaha Śledčy kamitet zajaviŭ, što palityk «599 razoŭ pierasiakaŭ dziaržmiažu Biełarusi, ź ich 33 — paśla 2020 hoda», a jaho kantakty z pradstaŭnikami palityčnych kołaŭ Jeŭropy i ZŠA nibyta mohuć śviedčyć pra «kaardynacyju jaho dziejnaści z-za miažy».
Adnak na sudzie hetyja abvinavačvańni nie prahučali. Jak zajaviła prakuror, Dźmitryjeŭ trojčy ŭdzielničaŭ u niesankcyjanavanych masavych akcyjach u Minsku z 23 žniŭnia da 6 vieraśnia 2020 hoda, «dałučaŭsia da hrupy ludziej, jakija hruba parušajuć hramadski paradak, vychodziŭ na prajeznuju častku darohi, što paciahnuła parušeńnie pracy transpartu, zaklikaŭ da parušeńnia paradku, jahonyja dziejańni byli nakiravanyja na abvastreńnie napružanaści ŭ hramadstvie». U vyniku palityka pryznali vinavatym pavodle č. 1 art. 342 KK.
U pačatku maja ŭ Andreja Dźmitryjeva pamierła maci, jakaja ciažka pieražyvała źniavoleńnie syna. Na pachavańnie jaho nie adpuścili.
Ciapier čytajuć
Kolkaść achviar vybuchu ŭ maskoŭskim elitnym restaranie na jubilei hienierała, jaki kamandavaŭ nastupam na Kijeŭ ź Biełarusi ŭ 2022-m, vyrasła da piaci čałaviek44
Kamientary