Jašče adzin stary tavaryš Łukašenki vyjšaŭ z apały i pačaŭ źjaŭlacca «pry dvary»
Alaksandr Łukašenka prajaŭlaje znaki ŭvahi da zabytaha chakiejnaha treniera Michaiła Zacharava: taho pačali zaprašać na mierapryjemstvy dla łukašenkaŭskaj elity. Ale ź niuansam.
Michaił Zacharaŭ — kolišni ŭdzielnik «łaźnievaha kłuba» Łukašenki, jak nazyvajuć kampaniju najbližejšych da Łukašenki ludziej pačatku 2000-ch. Tam byli taksama Juryj Čyž, Uładzimir Kanaploŭ, Siarhiej Ciacieryn, Alaksandr Šakucin.
U adnosinach hetych ludziej z Łukašenkam byli ŭźloty i padzieńni, amal usie prajšli praz apału, kamuści pryjšłosia pasiadzieć u SIZA.
Zacharaŭ byŭ adnym z doŭhažycharoŭ łukašenkaŭskaha «dvara», ale z momantu ŭzvyšeńnia Natalli Ejsmant i Dźmitryja Baskava, taksama treniera, jon staŭ hublać upłyŭ, a z 2021-ha ŭvohule adpraviŭsia ŭ prafiesijny i infarmacyjny niabyt, straciŭšy dostup da Łukašenki i da pracy.
Ale, jak raskazali «Našaj Nivie» abaznanyja surazmoŭcy, apošnim časam Zacharaŭ staŭ znoŭ byvać na publicy. Inicyjatyvu viarnuć staroha tavaryša prypisvajuć Łukašenku.
«Łukašenka nie farmiruje śpisaŭ zaprošanych na mierapryjemstva sa svaim udziełam. Kaho zaprašać, vyrašajuć inšyja ludzi. Kali pobač źjaviŭsia duet Ejsmant i Baskava, to pa ich inicyjatyvie Zacharaŭ byŭ adsunuty nazad. Tam pryčyn šmat možna znajści i padać ich Łukašenku, jak tabie vyhadna.
A ciapier, ja dumaju, jamu prosta niama z kim pahavaryć. Usio ž taki Baskaŭ da jaho na «vy», usie navokał da jaho na «vy». A Zacharaŭ — vychadziec z samaj pieršaj łaźnievaj kampanii, jaki ź im na «ty» pry ŭsich svaich minusach. Ź im možna havaryć. Kali Łukašenka viazie svajo blizkaje koła ŭ niejkija važnyja dla jaho miescy ŭnutry krainy, to prosić uziać Zacharava. Kali nie prosić, to inšyja ludzi robiać tak, kab jaho nie zaprašali», — patłumačyŭ «Našaj Nivie» čałaviek, blizki da słužby pratakoła Łukašenki.
Michaił Zacharaŭ pracuje pamočnikam hałoŭnaha treniera ŭ chakiejnym kłubie «Junijor». U minułym jon vielmi blizki da Alaksandra Łukašenki čałaviek, jaki adnaznačna paŭpłyvaŭ na zachapleńnie Łukašenki hetym vidam sportu.
Jon šmat hod treniravaŭ staličnaje «Junactva», ź jakim vyjhravaŭ unutrany čempijanat. Trojčy byŭ hałoŭnym trenieram zbornaj Biełarusi. Ale paśla taho, jak kamanda zaniała pieradapošniaje miesca na čempijanacie śvietu ŭ 2021-m, pasadu straciŭ i hod siadzieŭ biez pracy.
U 2020 hodzie Zacharaŭ padtrymaŭ režym Łukašenki.
«Naša Niva» — bastyjon biełaruščyny
PADTRYMAĆČytajcie taksama: Ciacieryn, Zacharaŭ, Korbut i Ksienija Sankovič — «bryhada» Łukašenki na subotniku FOTY
Ciapier čytajuć
Šakujučaja strata hoda, tajamničyja źniknieńni, dykpiki i departacyi — asnoŭnyja ludzi i padziei 2025 hoda4
Kamientary