Siońnia kiraŭnika Symbal.by Paŭła Biełavusa pakarali strašennym prysudam — 13 hadoŭ kałonii. Abvieščany zbor hrošaj na apłatu advakata i dla siamji Paŭła.
«Pavieł Biełavus bolš za 10 hadoŭ raźvivaŭ prajekty ŭ śfiery biełaruskaj kultury i nacyjanalnaj identyčnaści. Jon stajaŭ la vytokaŭ «Art Siadziby», placoŭki, dzie debiutavali i vystupali biełaruskija paety, piśmieńniki, muzykanty. Pavieł byŭ arhanizataram hučnych kulturnych imprezaŭ i kancertaŭ — «Dzień vyšyvanki» ŭ 2014 hodzie, śviatkavańnie 100-hodździa Biełaruskaj Narodnaj Respubliki ŭ 2018 hodzie, «Mova Fest» u 2020 hodzie. Taksama Pavieł zasnavaŭ kramu «Symbal.by», adno ź niešmatlikich miescaŭ u Minsku, dzie možna było nabyć tavary z nacyjanalnaj simvolikaj. A ŭ 2020 hodzie Pavieł zasnavaŭ hramadskuju kampaniju «Hodna», metaj jakoj stała stvareńnie sučasnaj kulturnaj asnovy dla Biełarusi.
Bolšuju častku svajho śviadomaha žyćcia Pavieł pryśviaciŭ idei «biełaruskaj Biełarusi». Pabudovie Biełarusi, dzie ludzi šanujuć svaje tradycyi, karystajucca svajoj movaj, majuć nacyjanalnuju hodnaść i sami abirajuć šlach svajoj krainy. Adnak ciapierašni palityčny režym paličyŭ tyja mary «ekstremizmam» i kvalifikavaŭ ich pavodle kryminalnaha artykuła «zdrada dziaržavie».
11 maja Minski haradski sud, razhledzieŭšy kryminalnuju spravu suprać Paŭła Biełavusa ŭ zakrytym režymie, vynies jamu pryhavor u 13 hadoŭ. Heta adkaz palityčnaha režymu nie tolki Paŭłu, ale kožnamu biełarusu, jaki maryć pra dziaržavu z ułasnaj žyvoj kulturaj i mocnaj nacyjanalnaj śviadomaściu hramadzian. Heta adkaz tym, chto hatovy pracavać dziela budučyni niezaležnaj Biełarusi.
U Paŭła Biełavusa na voli zastałasia žonka Kaciaryna i dvoje maleńkich dziaciej. U siamji Paŭła kanfiskavanyja mašyny, častka bytavoj techniki. Usia majomaść u domie (ad šafy da imbryka) apisanaja i moža być kanfiskavanaja. Padtrymajcie siamju Paŭła Biełavusa, čałavieka, jaki addaŭ svaju svabodu dziela lubovi da Biełarusi!
Jakaja suma nieabchodnaja?
15000€ — Sabranaja suma pojdzie na apłatu pracy advakataŭ, a taksama na nabyćcio nieabchodnych dla žyćcia rečaŭ i pakryćcio bytavych vydatkaŭ siamji Paŭła.
Padtrymać siamju Paŭła Biełavusa
Ciapier čytajuć
Apakalipsis zaŭtra. Statkievič napisaŭ pieršy artykuł — z papiaredžańniem pra niebiaśpieku z boku Rasii63
Kamientary