Prezident Litvy ŭ ankiecie nie ŭkazaŭ, što ŭ 1988 hodzie ŭstupiŭ u kampartyju
Žurnalist Davidas Pancerovas u sieradu ŭ fejsbuku padzialiŭsia dakumientami, pavodle jakich u mai 1988 hoda ciapierašni prezident Litvy Hitanas Naŭsieda napisaŭ zajavu z prośbaj pryniać jaho ŭ kampartyju. Prezidenckaja słužba hety fakt paćvierdziła, ale adznačyła, što ŭ dziejnaści partyi Naŭsieda nie ŭdzielničaŭ. U ankiecie kandydata hetaj infarmacyi nie było, tak jak hetaja infarmacyja nie źjaŭlajecca abaviazkovaj, piša Delfi.lt.
Pancerovas skazaŭ, što dniami Litoŭski śpiecyjalny archiŭ abnarodavaŭ śpisy ludziej, jakich pavinny byli vysłać ź Litvy, a taksama inšyja spravy archiva. U ich jość i dakumienty prezidenta Naŭsiedy.
Siarod dakumientaŭ jość zajava Naŭsiedy na ŭstupleńnie ŭ kampartyju ad 20 maja 1988 hoda, partyjny bilet jamu byŭ vydadzieny 27 červienia taho ž hoda. Pancerovas u fejsbuku padkreśliŭ, što nie ličyć i nie śćviardžaje, što «členstva ŭ kamunistyčnaj partyi — heta niazmyŭnaja plama».
«Adnak prezident Naŭsieda ŭ svaich vystupach kaža pra «Sajudzis», mitynhi «Sajudzisa» (arhanizacyi, što ŭznačaliła ruch za niezaležnaść Litvy ŭ kancy 1980-ch — NN), a nasamreč u toj čas jon abraŭ inšy bok barykady, prynamsi, aficyjna», — napisaŭ žurnalist.
Jon nahadaŭ, što eks-prezident Litvy Dala Hrybaŭskajcie, u adroźnieńnie ad Naŭsiedy, ukazvała ŭ ankiecie členstva ŭ kampartyi. Pa słovach Pancerovasa, śpiecyjalisty nie asprečvajuć sapraŭdnaść hetych dakumientaŭ. Žurnalist u sacyjalnaj sietcy padzialiŭsia i adkazam prezidenckaj słužby.
«Prezident Naŭsieda byŭ pryniaty ŭ kampartyju ŭ mai 1988 hoda. Adpaviednyja dakumienty zachoŭvajucca ŭ Dziaržarchivie, i jany dastupnyja dla hramadstva. Kali pačaŭsia «Sajudzis», Naŭsieda ŭ dziejnaści kampartyi nie ŭdzielničaŭ», — skazana ŭ kamientary.
U adkazie taksama paviedamlajecca, što «ŭ ankiecie kandydata ŭ prezidenty pytańnie ab partyjnaj prynaležnaści znachodzicca ŭ toj častcy, zapaŭniać jakuju nieabaviazkova».
Kamientary