Biełaruś nie pieršaja kraina, jakuju nakryła chvala epidemii. Jaje scenar usiudy adnolkavy.
Biełaruś nie pieršaja kraina, jakuju nakryła chvala epidemii. Jaje scenar usiudy adnolkavy.
Jak daviedałasia NN.BY z nadziejnaj krynicy ŭ adnoj ź minskich bolnic, u miedyčnyja ŭstanovy horada pryjšoŭ list z ukazańniem uvieści miery pieraściarohi. U vyniku ŭ balnicach spyniena naviedvańnie chvorych, uzmocniena pilnaść u pryjomnych pakojach. Hetaja krynica paviedamiła, što pa stanie na piatnicu, 30 kastryčnika, u krainie zafiksavana 39 śmierciaŭ, ź ich 9 u Minsku ad pnieŭmanii.
Paźniej Kamitet achovy zdaroŭja Minharvykankamu paćvierdziŭ, što ŭ suviazi z pavieličeńniem kolkaści chvorych na hryp i VRVI isnuje płan pieraprafilavańnia adździaleńniaŭ balnic. «Pryniata rašeńnie nie puskać naviednikaŭ u balnicy da stacyjanarnych chvorych». Aficyjna, adnak, karancin nie ŭvodziŭsia.
Z roznych špitalaŭ prychodziać razroźnienyja viestki, što tam fiksavalisia śmiarotnyja vypadki. Kanajuć pieravažna maładyja ludzi. Adpaviednyja słužbovyja dakumienty trapili ŭ rasparadžeńnie ahienctva BiełaPAN.
Miž tym epidemijołahi praciahvajuć zajaŭlać, što nijakaj epidemii ŭ krainie niama. Hałoŭnaja sanitarnaja doktarka krainy Valancina Kačan zajaviła ahienctvu BIEŁTA, što jaje słužba ŭvažliva adsočvaje situacyju i što ŭsie chvoryja na pnieŭmaniju paśpiachova prachodziać kurs lačeńnia.
Adzinym vyklučeńniem z maŭčanki staŭ Drahičyn.
2 listapada hałoŭny doktar Drahičynskaha rajonnaha centra hihijeny i epidemijałohii Michaił Stachiejka ŭ intervju radyjo «Svaboda» paćvierdziŭ infarmacyju pra raptoŭnuju śmierć 37‑hadovaj nastaŭnicy z Tołkaŭskaj bazavaj škoły.
«Jana pamierła ad pnieŭmanii. Bolš dakładny dyjahnaz pastaviać kalehi ŭ Breście, kudy my nakiravali dla analizu nieabchodnyja materyjały. Havaryć jašče niešta dadatkova ja nie maju prava».
Nastaŭniki Tołkaŭskaj BŠ, ź jakimi taksama ŭdałosia pahutaryć, paviedamili, što ŭ piatnicu pierad kanikułami nastaŭnica, pra jakuju hutarka, pryjšła na pracu z prykmietami prastudy, ale praviała svaje ŭroki i kłasnuju hadzinu. Da doktara źviarnułasia tolki na poźniaj stadyi chvaroby.
Jak paviedamiła naša krynica ŭ inšaj balnicy, u ich ustanovie, a taksama šerahu staličnych balnic admienieny płanavyja apieracyi, a ŭsie anestezijołahi zaniatyja lačeńniem i ratavańniem chvorych na hryp, VRVI i vyklikanyja imi ŭskładnieńni.
Paźniej infarmacyju paćvierdzili ŭ Kamitecie achovy zdaroŭja Minharvykankamu.
Jak paviedamiła ŭ aŭtorak Ministerstva achovy zdaroŭja, za minuły tydzień u krainie zafiksavana 70 tys. vypadkaŭ zachvorvańnia na hrym i VRVI. Usiaho za kastryčnik — 322 tys. vypadkaŭ vostrych reśpiratornych infiekcyj. Heta na 41% bolš, čym za anałahičny pieryjad minułaha hoda.
«Horad nie hatovy da najaŭnaj situacyi», — padkreśliła naša krynica.
Va Ukrainie, dzie miedyčnaja statystyka adkrytaja, zajaŭlena pra bolš čym 200 tysiač chvorych na vostruju virusnuju infiekcyju. 71 čałaviek pamior.
U Biełarusi orhany achovy zdaroŭja aficyjna zajaŭlajuć, što śmierciaŭ u vyniku virusnaj infiekcyi ci śvinoha hrypu nie zafiksavana.
U paniadziełak telefonnaje hałasavańnie na kanale ANT vyjaviła, što 93% respandentaŭ nie daviarajuć hetym zajavam i ličać, što situacyja patrabuje surjoznych zachadaŭ.
Pakul zarana kazać, ci biełaruskija daktary majuć spravu tolki sa śvinym hrypam ci taksama ź inšym varyjantam virusnaj infiekcyi.
Charakterna tolki toje, što sioletniaja infiekcyja raspaŭsiudziłasia nadzvyčajna rana jak dla hrypu i, u nievialikaj kolkaści vypadkaŭ, daje surjoznyja ŭskładnieńni ŭ vyhladzie chutkaciečnych pnieŭmanij, ad jakich litaralna razvalvajucca lohkija.
Hetyja simptomy charakternyja akurat dla hrypu śvinoha. Mienavita jon vyklikaje ciažkija ŭskładnieńni ŭ nievialikaj kolkaści vypadkaŭ. Padkreślivajuć daktary: u nievialikaj.
Biełaruś nie pieršaja kraina, jakuju nakryła chvala epidemii. Jaje scenar usiudy adnolkavy. Chutka ŭ ludziej vypracujecca imunitet, i A/H1N1 adstupić.Adnak zastanucca pytańni.
Zamoŭčvańnie hrypu vyklikała epidemiju paniki. Heta pahoršyć situacyju. Vinavataja ŭ joj sistema tatalnaha infarmacyjnaha kantrolu i bojaź inicyjatyvy na ŭsich uzroŭniach. Heta sistemnyja zahany.
Vyhladaje, što nie da kanca padrychtavanaj była i miedyčnaja sistema krainy. Preparata «Tamiflu» ŭ dastatkovaj kolkaści zavieziena nie było, a mienavita jon patrebny, kab ratavać ludziej z uskładnieńniami. Ukraina zreahavała na niebiaśpieku chutčej i atrymała dapamohu Suśvietnaj arhanizacyi achovy zdaroŭja.
Tym časam ułady pa zaviadzioncy valać z chvoraj hałavy na zdarovuju — internetnyja srodki masavaj infarmacyi, jakija, sa słovaŭ namieśnicy ministra infarmacyi Lilii Ananič, «raździmajuć ažyjataž».
«Sapraŭdy, u susiednich krainach abvieščana žorstkaja epidemijałahičnaja situacyja, ale ŭ Biełarusi ničoha nie adbyvajecca takoha, što było b niepaduładna našaj miedycynie. Tak, jość zachvarełyja, jość pieraboi ź lekavymi srodkami, ale kali siońnia ŚMI vykličuć usich hramadzian našaj krainy ŭ apteki, to možna sabie pradstavić, što budzie z hetymi aptekami, — skazała Lilija Ananič, praciahnuŭšy, što niama nijakaj patreby biehčy ŭ apteki i zakuplać leki. — Treba vieści zdarovy ład žyćcia, zvyčajna hadavać dziaciej i chadzić na pracu, a miedyki buduć rabić svaju spravu», — padkreśliła jana.
USIE NAVINY NA TEMU EPIDEMII HRYPU, PARADY, DAVIEDKI I ŽARTY
Ciapier čytajuć
Šeść faktaŭ pra Andreja Švieda — byłoha hienprakurora, jaki ciapier staŭ staršynioj Viarchoŭnaha suda4
Kamientary