A što ž tady zaraz adbyvajecca?
Epidemija hrypu čakajecca ŭ Minsku ŭ kancy śniežnia — studzieni, paviedamiła zahadčyca epidemijałahičnaha adździeła Minskaha haradskoha centra hihijeny i epidemijałohii Alena Fisienka.
Pavodle jaje słoŭ, ciapier situacyja z zachvorvańniem na hryp i VRVI aceńvajecca jak pieradepidemičnaja. Štodnia ŭ Minsku rehistrujecca prykładna 5—6 tys. zvarotaŭ u suviazi z hetymi zachvorvańniami.
Usiaho za papiaredni tydzień takich zvarotaŭ było zarehistravana krychu bolš jak 26,5 tys., ź ich prykładna 7% — vypadki hrypu.
Jak paviedamiła Fisienka, kolkaść zvarotaŭ u palikliniki ŭ suviazi ź virusam hrypu i VRVI ŭ siarednim na 20% vyšejšyja, čym za anałahičny pieryjad minułaha hoda. Jak rastłumačyła śpiecyjalist, heta źviazana z tym, što źjavilisia novyja varyjanty virusa hrypu — virus A (H1N1). Pa svaich simptomach jon padobny na siezonny virus hrypu, adnak zdolny chutka raspaŭsiudžvacca z-za taho, što ŭ nasielnictva adsutničaje da jaho imunitet.
«Praz našu statystyku nivodnaha vypadku śmierci ad hrypu nie prachodziła», — padkreśliła Fisienka. Rehistravalisia vypadki śmierci ad pnieŭmanii, jakaja moža ŭźniknuć na fonie asłableńnia imunitetu paśla VRVI i hrypu.
Pavodle słoŭ Fisienki, pravodzicca manitorynh zachvorvańnia na VRVI i hryp. U vypadku pieravyšeńnia epidemijałahičnaha parohu adrazu ž buduć pryniaty dadatkovyja miery z metaj spynić raspaŭsiudžvańnie zachvorvańniaŭ. U ich liku — karancin u škołach, abmiežavańnie praviadzieńnia masavych vidoviščnych mierapryjemstvaŭ.
Jak adznačyła Fisienka, pradaŭžeńnie kanikułaŭ u staličnych škołach — heta prafiłaktyčnaja miera, skiravanaja na toje, kab «paźbiehnuć łakalnych uspyšak zachvorvańnia ŭ Minsku».
Pavodle jaje słoŭ, treba razumieć, što hetaja miera na siońniašni dzień nie spynić raspaŭsiudžvańnie hrypu. «Heta infiekcyja vielmi lohka pieradajecca, i pakul u minčan nie sfarmirujecca imunitet, na žal, zachvorvańnie nie spynicca», — adznačyła śpiecyjalist. Adnak, pavodle jaje infarmacyi, pradoŭžyć kanikuły ŭ minskich škołach jašče na tydzień pakul nie płanujecca.
Usie naviny na temu epidemii hrypu, parady, daviedki i žarty
Kamientary