Stała viadoma pra vykanańnie śmiarotnaha prysudu słuččaku Viktaru Skrundziku
Stała viadoma data pryviadzieńnia ŭ vykanańnie śmiarotnaha prysudu ŭ adnosinach da słuččaka Viktara Skrundzika. Prysud u adnosinach da jaho ŭstupiŭ u siłu 4 maja 2021 hoda. Zhodna z dakumientami, jakija jość u rasparadžeńni pravaabaroncaŭ, Viktar Skrundzik byŭ rasstralany 16 lipienia 2022 hoda.
Biełaruskija ŭłady pryviali ŭ vykanańnie śmiarotny prysud praz adzin hod i paŭtara miesiaca, paviedamlaje «Viasna».
Minski abłasny sud na vyjaznym pasiadžeńni ŭ Słucku 6 sakavika 2020 hoda asudziŭ troch žycharoŭ Słuččyny da vialikich terminaŭ źniavoleńnia, a Viktara Skrundzika — da śmiarotnaha pakarańnia. Ich abvinavacili ŭ zabojstvie piensijanieraŭ i zamachu na zabojstva 85-hadovaj žančyny. Ale praź niekalki miesiacaŭ kalehija Viarchoŭnaha Suda pa kryminalnych spravach admianiła śmiarotny prysud Viktaru Skrundziku ŭ paradku apielacyi. Spravu viarnuli na novy razhlad u Minski abłasny sud.
15 studzienia 2021 hoda Minski abłasny sud na vyjaznym pasiadžeńni ŭ Słucku vynies takija ž prysudy, jak i pieršy raz. U adnosinach da Viktara Skrundzika byŭ znoŭ vyniesieny śmiarotny prysud. Praź piać miesiacaŭ Viarchoŭny Sud znoŭ razhledzieŭ apielacyjnuju skarhu słuččaka — hetym razam kalehija nie zadavoliła jaje. 4 maja 2021 hoda śmiarotny prysud ustupiŭ u siłu.
Heta ŭžo nie pieršy vypadak, kali pravaabaroncy i hramadskaść daviedvajucca pra los asudžanaha da śmiarotnaha pakarańnia praz taki dastatkova doŭhi termin. Naprykład, Viktar Paŭłaŭ byŭ rasstralany 13 maja 2021 hoda, a jaho svajaki atrymali dakumienty tolki ŭ listapadzie 2021 hoda, uvieś hety čas jany nie viedali pra jaho los.
Varta nahadać, što da hetaha pravaabaroncam nie viadomy los Viktara Sierhiela, asudžanaha da śmiarotnaha pakarańnia 25 kastryčnika 2019 hoda. 31 studzienia 2020 hoda pry razhladzie apielacyjnaj skarhi jamu było admoŭlena ŭ źmienie miery pakarańnia, i z taho času jon moh być rasstralany faktyčna ŭ luby momant.
Kaardynatar «Pravaabaroncy suprać śmiarotnaha pakarańnia» Andrej Pałuda adznačaŭ, što pravaabaroncam nieviadoma pra vypadki vyniasieńnia śmiarotnych prysudaŭ u 2022 hodzie:
«Uvohule varta adznačyć, što pytańnie śmiarotnaha pakarańnia zaŭsiody znachodziłasia pad zasłonaj sakretnaści, a ciapier manitorynh hetych spraŭ adbyvajecca jašče składaniej. Tamu śćviardžać, što ŭ 2022 hodzie nie byli pryviedzienyja ŭ vykanańnie śmiarotnyja prysudy, my nie možam. My vykarystoŭvajem dastatkova aściarožnuju farmuliroŭku ab tym, što nam pra ich nieviadoma».
Akramia hetaha, kaardynatar kampanii adznačyŭ, što prablema śmiarotnaha pakarańnia ŭ krainie ŭ 2022 hodzie była ŭ fokusie ŭvahi, u tym liku praź niekatoryja surjoznyja źmieny ŭ zakanadaŭstvie, zhodna ź jakim ciapier praduhledžana śmiarotnaje pakarańnie za «zamach na akt teraryzmu».
«Hetyja źmieny zakanadaŭstva adkryvajuć jašče bolšyja varoty, bo navat za toje, što čałaviek jašče nie ździejśniŭ, mohuć asudžać da śmiarotnaha pakarańnia. Kaniečnie, precedentaŭ pa hetych źmienach pakul niama. Ale, jak kažuć pra toje ružžo, što visić na ścianie: moža pryjści taki momant u hetym usim śpiektakli, kali jano strelić. I heta, darečy, karelujecca z tym, pra što my ŭvieś čas nie tolki havaryli, ale kryčali. I nas nie čuli. My kryčali i prasili: «Pasłuchajcie nas!» A nas nie čuli. Ci, prynamsi, čuli nie ŭsie. Mahčyma, my zaraz možam dahrukacca da ludziej», — kamientavaŭ zakanadaŭčyja źmieny Andrej Pałuda.
«Adnaho rasstralajuć — znojducca inšyja». Repartaž ź viosak, dzie žorstka zabili starych
«Zasiarodžusia na pracy z ZŠA». Cichanoŭski raskazaŭ pra svaje palityčnyja płany na 2026 hod22
Kamientary