U ZŠA stvaryli mužčynski supraćzačatkavy srodak, jaki časova paralizuje śpiermatazoidy
Navukoŭcy z ZŠA vyjavili i paśpiachova vyprabavali na myšach rečyva, jakoje moža pryvieści da stvareńnia kantraceptyvu dla mužčyn, što budzie dziejničać chutka i ŭsiaho niekalki hadzin — maksimum dzień, paviedamlaje Bi-bi-si.
Daśledčyki pad kiraŭnictvam doktara Miełani Bołbach ź Miedycynskaha kaledža Vejł Korneł u Ńju-Jorku pry padtrymcy nacyjanalnych instytutaŭ achovy zdaroŭja ZŠA, jakija apublikavali pracu ŭ časopisie Nature Communications, zajavili, što ŭ budučyni mužčyny zmohuć prymać hety kantraceptyŭ niepasredna pierad seksualnaj aktyŭnaściu, i ich fiertylnaść budzie adnoŭlenaja ŭžo na nastupny dzień.
Daśledčyki vyjavili, što rečyva TDI-11861 paralizuje śpiermatazoidy i pieraškadžaje ich paśpiavańniu, nie parušajučy pry hetym pałavuju funkcyju.
Heta rečyva časova deaktyvuje fiermient, jaki žyćciova važny dla taho, kab śpiermatazoidy mahli «płavać» i śpieć, prajści praz žanočy repraduktyŭny trakt i apładnić jajcakletku.
Jak pakazali ekśpierymienty, choć samcy myšej, jakim davali heta rečyva, niekalki razoŭ sparvalisia z samkami, ciažarnaść nie nadychodziła. Pabočnych efiektaŭ taksama nie nazirałasia ni ŭ samcoŭ, ni ŭ ich samak. Prykładna praz try hadziny dziejańnie rečyva słabła, i samcy hryzunoŭ adnaŭlali svaju fiertylnaść.
Hałoŭnaja vysnova daśledavańnia ŭ tym, što «rastvaralnyja inhibitary adeniłatcykłazy patencyjna mohuć stać biaśpiečnym, dastupnym u luby čas, nieharmanalnym i abaračalnym aralnym kantraceptyvam dla mužčyn».
Na siońnia mietady mužčynskaj kantracepcyi abmiažoŭvajucca vykarystańniem preziervatyvaŭ i chirurhičnaj sterylizacyjaj z dapamohaj vazektamii. Sproby raspracavać mužčynskija kantraceptyvy ŭ formie tabletak da hetaha času strymlivalisia nizkaj efiektyŭnaściu, pavolnym dziejańniem abo pabočnymi efiektami.
Novaje rečyva daje vialikija nadziei, ale jaho jašče treba budzie vyprabavać na ludziach.
Efiektyŭnaść kantraceptyvu, vyprabavanaha na žyviołach, skłała 100% na praciahu pieršych dźviuch hadzin paśla pryjomu i 91% na praciahu pieršych troch hadzin.
Viartańnie fiertylnaści ŭ mužčyn zaŭsiody zaviaršałasia na praciahu 24 hadzin. Paśla bieśpierapynnaha pryjomu rečyva (injekcyjna abo pieraralna) ciaham šaści tydniaŭ pabočnych efiektaŭ nie nazirałasia.
Čytajcie taksama:
Daśledčyki vyjavili jašče adzin karysny efiekt ad «Vijahry»
Dziaržava dla naroda: u Francyi preziervatyvy zrobiać biaspłatnymi dla moładzi ad 18 da 25
«Muž sam papaŭniaje kalekcyju». Biełaruski raskazali, jak u ich łožku źjavilisia seks-cacki i jakija
-
Alimpijski pryzior Maksim Niedasiekaŭ ažaniŭsia druhi raz. Hetym razam z Łalitaj
-
Maładoje pakaleńnie pierastała hetaha saromiecca: 22% amierykancaŭ pakaleńnia Z ličać siabie ŁHBTK. Absalutnaja bolšaść ź ich — heta biseksuały
-
Biełarus zrabiŭ prapanovu kachanaj kala znakamitaha fantana Trevi ŭ Rymie — pad apładysmienty dziasiatkaŭ turystaŭ
Ciapier čytajuć
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ9
Kamientary