Polski bok paviedamiŭ, što punkt propusku «Babroŭniki» na miažy ź Biełaruśsiu z 10 lutaha prypynić svaju pracu «ź mierkavańniaŭ nacyjanalnaj biaśpieki». Svajo rašeńnie Varšava pryniała praź dzień paśla prysudu Andreju Pačobutu. «Naša Niva» tłumačyć, jak heta zakryćcio adabjecca na biełarusach.
Zastałosia dva z šaści punktaŭ propusku ŭ Polšču
Da pandemii COVID-19 na biełaruska-polskaj miažy funkcyjanavała šeść aŭtadarožnych punktaŭ propusku, ciapier takich zastałosia tolki dva.
Abodva mieściacca ŭ Bresckaj vobłaści. Punkt propusku «Brest — Ciarespal» pryznačany dla ruchu lehkavoha transpartu, a «Kazłovičy — Kukuryki» — vyklučna dla hruzavoha.
«Bierastavica — Babroŭniki» zastavaŭsia apošnim multyfunkcyjanalnym punktam propusku na biełaruska-polskaj miažy. Taksama jon byŭ apošnim dziejnym u Hrodzienskaj vobłaści.
Praz abvastreńnie mihracyjnaha kryzisu, da jakoha byŭ datyčny i biełaruski bok, Polšča vyrašyła zakryć z 21 listapada 2021 hoda punkt propusku «Bruzhi — Kuźnica». Zakryćcio vialikaha pamiežnaha punkta, jaki byŭ zdolny prapuskać za sutki da 1600 lehkavych i 580 hruzavych aŭto, pryviało da vielizarnych čerhaŭ. U pikavyja miesiacy dalnabojščyki tydniami byli vymušany stajać u čerhach na miažy.
Čaho čakać ad takoha rašeńnia?
Zakryćcio jašče adnaho punkta propusku pryviadzie da ŭskładnieńnia situacyi z čerhami na miažy, što ŭ svaju čarhu pavialičyć staŭki na pieravozku hruzaŭ i pasažyraŭ.
U najhoršaj situacyi akažucca žychary Hrodzienskaj vobłaści. Ciapier im budzie našmat składaniej patrapić u Polšču. Asabliva tym, chto jedzie tudy na hramadskim transparcie. Pieravozčykam spatrebicca čas, kab pierabudavać maršruty i ŭzhadnić ich.
I kali pajezdki na zakupy možna adkłaści da lepšych časoŭ ci zamiest Biełastoka źjeździć u Vilniu, to tym, chto pracuje ci vučycca ŭ Polščy, daviadziecca tracić na pajezdki praź miažu bolš času i hrošaj.
Pacierpiać ad zakryćcia «Bierastavicy» i miascovyja čaŭnaki. Peŭnyja straty ad takoha rašeńnia paniasie i polski bok, bo z ulikam novych abstavin moža stać mienš ludziej, jakija buduć hatovyja jechać na šopinh u Biełastok.
Ad 10 lutaha šlach z Hrodna da Biełastoka na aŭto budzie pralahać praz Brest abo praź Litvu. Z zajezdam u Brest atrymajecca bolš za 400 kiłamietraŭ. Kali jechać praź Litvu, to kala 250 kiłamietraŭ.
Daroha z Hrodna da Biełastoka praz punkt «Bierastavica — Babroŭniki» składaje 120 kiłamietraŭ. Samym karotkim byŭ šlach praz zakrytyja «Bruzhi» — 85 kiłamietraŭ.
Čytacie taksama: «Visić nacyjanalny ściah ukrainski, i paviesili jašče bečebešnuju anuču». Staršynia Dziaržpahrankamiteta pra situacyju na miažy
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii12
Kamientary