Sustreču biełaruskaj apazicyi ŭ Rumynii arhanizoŭvaŭ palittechnołah, jaki raniej byŭ źviazany ŭ tym liku z Kałamojskim
U ŚMI prajšła infarmacyja pra sustreču pradstaŭnikoŭ apazicyjnych struktur u Rumynii, arhanizavanuju ŭkraincami. Ale nakolki možna daviarać tym arhanizataram?
Jak paviedamiła «Radyjo Svaboda», sustreča pradstaŭnikoŭ niekatorych apazicyjnych struktur i pradstaŭnikoŭ Pałka Kalinoŭskaha adbyłasia na pačatku śniežnia 2022 hoda. Ale infarmacyja pra tuju sustreču vyjšła ŭ publičnuju prastoru tolki ciapier.
Niekatoryja miarkujuć, što «ŭkrainski bok zładziŭ taki prahlad dziejačaŭ apazicyi, kab zrazumieć, z kim mieć spravu ŭ budučyni».
U sustrečy brali ŭdzieł pradstaŭnik Abjadnanaha kabinieta pa adnaŭleńni zakonnaści i pravaparadku Alaksandr Azaraŭ, daradca Śviatłany Cichanoŭskaj Alaksandr Dabravolski, palityk Valeryj Capkała, palitołah Pavał Vusaŭ, sacyjołah Hienadź Koršunaŭ, ekołah Jarasłaŭ Biekiš, były čynoŭnik Anatol Kotaŭ, pradstaŭniki Pałka Kalinoŭskaha Vadzim Kabančuk i Dźmitryj Ščyhielski, kiraŭnik «Biełaha lehijona» Siarhiej Bulba dy inšyja.
Formaj sustrečy arhanizatary abrali stratehičnuju hulniu pa situacyi ŭ Biełarusi. Heta značyć, udzielnikam prapanoŭvali sprahnazavać raźvićcio padziej i raskazać pra ŭłasnyja dziejańni. Usio skazanaje zapisvałasia ŭkrainskimi arhanizatarami. Adnak chto byli hetyja arhanizatary?
«Rumynija nasamreč pakazała mnohim, kudy ruchacca dalej. Kali raniej ludzi mahli sabie tolki ŭjavić, što moža być, to ŭ Rumynii jany ŭbačyli, jak heta moža być nasamreč», — skazaŭ «Radyjo Svaboda» Dźmitryj Hramakoŭ, jakoha pradstaŭlajuć namieśnikam dyrektara «Mižnarodnaha centra supraćdziejańnia rasijskaj ahresii». Adnak na sajcie centra nie nazyvajecca nivodnaha imieni. Havorycca tolki, što «kamandu centra składajuć śpiecyjalisty pa kamunikacyjach, psichałohii, sacyjałohii i kibierbiaśpiecy, dypłamaty, byłyja aficery, udzielniki vajny, dobraachvotniki z Ukrainy, Hruzii, Litvy, Łatvii, Polščy, Biełarusi i inšych krain».
«Mižnarodny centr supraćdziejańnia rasijskaj ahresii» isnuje ŭsiaho dva hady, z 2020 hoda. Za hety čas jon paśpieŭ pierajmienavacca, spačatku jon nasiŭ nazvu «Mižnarodny centr supraćdziejańnia rasijskaj prapahandzie».
Miarkujučy pa infarmacyi ŭ internecie, dyrektaram «Centra» byŭ Juryj Kačavienka, były aficer pres-słužby (aficer pa pytańniach stratehičnych kamunikacyj) Hienštaba Ukrainy — my, adnak, nie znajšli ŭ internecie infarmacyi, jak doŭha jon tam słužyŭ, jaki paźniej pracavaŭ u hramadskim siektary. Akramia centra, Kačavienka byŭ namieśnikam dyrektara inšaj struktury — «Instytuta siamiejnaj i maładziožnaj palityki». Ciapier Kačavienka vajuje na froncie jak aficer u składzie adnoj z bryhad i viadzie tvitar-kanał z 48 tysiačami fałovieraŭ.
Internet nie viedaje značnych padziej, arhanizavanych «Mižnarodnym centram supraćdziejańnia rasijskaj ahresii».
Dźmitryj Hramakoŭ — heta palitołah i palittechnołah z horada Dniapro, jakoha ŭkrainski rasśledavalnicki resurs nazyvaje jašče «psieŭdasacyjołaham» i «prychavanym pijarnikam». Ën absłuhoŭvaŭ ukrainskija aliharchičnyja palityčnyja siły, siarod jakich «Ukrop» — prajekt Kałamojskaha, Błok Litvina, «Silna Ukrajina». A taksama mieŭ błoh na sajcie «Ukrainskaha vybaru» adyjoznaha Viktara Miedźviedčuka. Rasśledavalniki pišuć, što Hramakoŭ publikavaŭ sumnieŭnyja «sacyjałahičnyja apytańni» małaviadomych struktur. Adnačasova internet viedaje jaho taksama jak pradstaŭnika Centra sacyjalnaha inžynirynhu «Realizacyja i analiz niesistemnych dziejańniaŭ».
Miarkujučy pa zhadkach u internecie, biełaruskuju tematyku jon adsočvaje bolš za 7 hadoŭ. U pryvatnaści, jon mieŭ kantakty z palitołahami z koła «Imchakłuba» i «Sanara-2050», paśla čaho na hetych sajtach źjavilisia abvinavaŭčyja publikacyi na jaho adras.
Chto stajaŭ za arhanizacyjaj sustrečy ŭ Rumynii, u vyniku niezrazumieła.
Kamientary