Adkul biarucca danyja ŭ botach, z dapamohaj jakich siłaviki deananimizujuć ludziej u Telegram

«T-Pošuk»

Pa telehramie MUS maje ŭłasnuju bazu danych «T-Pošuk». Imavierna, jana nie vielmi vialikaja, a napaŭniaje viedamstva jaje ŭłasnaručna — chutčej za ŭsio z adkrytych krynic (telehram-čataŭ i kamientaroŭ), praz kantakty z telefonaŭ zatrymanych ludziej, a taksama praz staryja viadomyja siłavikam bazy danych.

Taksama ŭ jaje mohuć unosicca danyja z atrymanych siłavikami «źlivaŭ», jakija adbylisia šlacham ukaranieńnia ahientaŭ (da prykładu, «baza ČKB») ci stvareńnia padrobnych botaŭ (jak było z botam «bataljona imia Kaściuški»). Ale kali nie atrymlivajecca znajści karystalnika takim šlacham, to siłaviki prybiahajuć da vykarystańnia Telegram-botaŭ, jakija šukajuć infarmacyju za ich.

Telehram-boty i servisy

U internecie isnuje šerah telehram-botaŭ i resursaŭ, jakija šukajuć infarmacyju pra ludziej unutry telehrama.

Jany naŭprost nie źviazanyja ź siłavikami i stvoranyja vyklučna ŭ kamiercyjnych metach. Takich botaŭ dziasiatki, i niekatoryja majuć unikalnyja funkcyi, jakich niama ŭ inšych. Baza ŭ botach papaŭniajecca za košt kupli ci dadavańnia bazaŭ danych z adkrytych krynicaŭ. Bolšaść z takich botaŭ płatnaja. Ale jany parušajuć zakony pra piersanalnyja danyja mnohich krain.

Adzin z najbolš viadomych — Eye of Beholder, jaki nabyvaje šmat roznych bazaŭ danych mienavita pa telehramie. Jon dazvalaje atrymać historyju źmianieńnia akaŭntaŭ i aktyŭnaści ŭ adkrytych čatach, a časta taksama i telefonny numar.

Kali siłaviki majuć telefonny numar (nie virtualny i nie zamiežny), to jany adnaznačna mohuć ustanavić haspadara akaŭnta. Taksama vielmi časta heta možna zrabić pa historyi źmianieńnia imia i niknejma.

Isnujuć i inšyja boty, jakija, da prykładu, mohuć adšukać ID stvaralnika luboha stykiera ci custom-emoji ŭ telehramie. Jak heta robicca, my pisali ŭ našym artykule — ale dla hetaha anijakich dadatkovych danych nie patrabujecca.

Adkul tam biarucca danyja?

Bazy danych byvajuć dvuch typaŭ: atrymanyja šlacham nazapašvańnia i analizu infarmacyi z adkrytych krynicaŭ i atrymanyja šlacham uzłomu resursaŭ. Zvyčajna vykarystoŭvajucca abodva varyjanty.

Isnuje vielizarnaja sietka akaŭntaŭ-botaŭ, jakija bieśpierapynna skanujuć usie viadomyja im adkrytyja čaty. Jany zapisvajuć imiony novych viadomych im karystalnikaŭ, ichnija juziernejmy i ID akaŭntaŭ. U vyniku jany farmujuć tablicy, jakija ŭtrymlivajuć u sabie historyju źjaŭleńnia čałavieka ŭ čacie, a taksama jahonaje imia ŭ toj momant.

Baza telefonaŭ akaŭntaŭ papaŭniałasia amal ad pačatku stvareńnia miesiendžara. Ludzi, jakija stvarali takija bazy, prosta zarehistravali sotni akaŭntaŭ, jakija bieśpierapynna dadavali ŭ kantakty ludziej pa ichnim numary (raniej niemahčyma było zabaranić pošuk pa im). A paśla taho, jak stała mahčyma pravieryć čałavieka pa numary biez dadavańnia ŭ kantakty (pa spasyłcy vidu t.me/+375000000000), jany pieryjadyčna «prastukvajuć» takija spasyłki, jakija sami i hienieryrujuć.

Takim čynam farmavalisia i praciahvajuć farmavacca źviazki «ID akaŭnt — numar», jakija paśla pierapradajucca inšym servisam.

U niekatorych botach isnujuć bazy danych stvaralnikaŭ stykieraŭ i custom emoji. Vidać, heta robicca tak: kali bot bačyć stykier u niejkim čacie ci niechta kidaje tudy jaho na pravierku, to jon «pryviazvaje» jaho da ID telehram-karystalnika.

Dla takich bazaŭ niavažna, ci vydaleny akaŭnt — u Telegram možna adšukać ID navat vydalenaha akaŭnta, a paśla pa ID źviazać jaho z kankretnym čałaviekam praz raniej stvoranuju bazu.

Taksama isnujuć bazy karystalnikaŭ roznych servisaŭ, pryviazanyja da telehrama, atrymanyja šlacham uzłomu, ale tak jak takich servisaŭ niašmat, to jany ŭtrymlivajuć (u adroźnieńnie ad, da prykładu, bazaŭ sacsietak) zusim nievialikuju kolkaść danych.

Čytajcie taksama:

Jakaja infarmacyja z Nexta i BHM mahła apynucca ŭ rukach łukašenkaŭcaŭ i što rabić biełarusam, jakija tudy pisali

Raspaviadajem, jak siłaviki znachodziać stvaralnikaŭ stykieraŭ u Telegram

Tłumačym, jakim čynam siłaviki znachodziać karystalnikaŭ Telegram i jak hetaha paźbiehnuć

• 9
• 0
• 4
• 11
• 8
• 5
• 44
• 0