Połackuju pradprymalnicu aryštavali za sprobu pieradać kalektyŭny zvarot miascovym uładam
U Połacku ŭ sieradu, 26 kastryčnika, zatrymali indyvidualnuju pradprymalnicu Taćcianu Šastak, jakaja źbirałasia pieradać staršyni Navapołackaha harvykankama Dźmitryju Dziamidavu pietycyju ad miascovych biznesmienaŭ. U zvarocie pradprymalniki prasili ŭłady rastłumačyć im, jak pracavać u novych umovach z cenaŭtvareńniem, piša «Viciebskaja viasna».
Taćcianu zatrymali a siomaj hadzinie ranicy, kali jana vychodziła sa svajho doma ŭ Połacku, i zavieźli ŭ miascovy RAUS. Paśla składańnia pratakoła ŭ jaje kvatery byŭ praviedzieny pieratrus, padčas jakoha milicyjanty kanfiskavali ŭsie dakumienty z kalektyŭnym zvarotam pradprymalnikaŭ da Dziamidava i asabisty telefon.
U hety ž dzień sud Połackaha rajona aryštavaŭ Šastak na 30 sutak. Siabry i svajaki nie zmahli patrapić na sudovaje pasiedžańnie, bo sud raptoŭna praviali ŭ paskoranym režymie.
Pakul nieviadoma, pa jakim artykule aryštavali pradprymalnicu. U sudzie jaje mužu admovilisia paviedamić, u čym abvinavacili Taćcianu.
29 kastryčnika svajaki sprabavali zrabić Taćcianie pieradaču, adnak kiraŭnik viciebskaha IČU biez tłumačeńniaŭ admoviŭsia prymać pradukty charčavańnia. Dazvolili pieradać źniavolenaj tolki srodki asabistaj hihijeny.
Ciapier čytajuć
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ13
Kamientary