«Vyvieli ŭ kajdankach». Zatrymali daśviedčanaha transpłantołaha, jaki rabiŭ apieracyi pa pierasadcy kaściavoha mozhu
5 kastryčnika ŭ Baraŭlanach na pracoŭnym miescy zatrymali viadomha transpłantołaha Alaksieja Viktaraviča Alaksiejčyka. Pra heta paviedamlajuć kalehi doktara.
Alaksieja Alaksiejčyka vyvieli ŭ kajdankach z RNPC dziciačaj ankałohii i hiematałohii na vačach kaleh, maleńkich pacyjentaŭ i ich baćkoŭ. Aficyjnaja pryčyna zatrymańnia nie paviedamlałasia.
Jak kažuć kalehi Alaksiejčyka, uviesnu 2022 hoda śpiecsłužby atrymali dostup da ŭnutranaha čata miedpracaŭnikoŭ RNPC. U im adkryta viałosia abmierkavańnie palityčnaj situacyi ŭ Biełarusi, pracy niezaležnaha prafsajuza «Panaceja» i inšaha. Mahčyma, zatrymańnie Alaksiejčyka źviazanaje z hetym čatam.
RNPC dziciačaj ankałohii i hiematałohii ŭ Biełarusi — pieradavaja ŭstanova. U inšych rehijonach krainy niama ni śpiecyjalistaŭ nieabchodnaha ŭzroŭniu padrychtoŭki, ni abstalavańnia. Časam siudy traplajuć dzieci ŭ krytyčnym stanie z-za taho, što miascovyja miedyki byvajuć niazdolnyja pastavić dyjahnaz.
Zatrymany doktar Alaksiejčyk ličycca adnym z samych daśviedčanych i prafiesijnych transpłantołahaŭ centra. Jon maje staž bolš za 20 hadoŭ, pravodziŭ apieracyi pa pierasadcy kaściavoha mozhu.
Pavodle słovaŭ pracaŭnikoŭ centra, uviesnu 2022 hoda niechta zdaŭ dostup da karparatyŭnaha čatu orhanam represiŭnaha aparatu. Paśla hetaha pačaŭsia novy vitok čystak u centry pa prykmiecie mierkavańniaŭ, vykazanych u pierapiscy.
Letam KDB zatrymaŭ doktarku Juliju Žarankovu i zahadčyka łabaratoryi hienietyčnych bijatechnałohij Alaksandra Mialešku (apošniamu dali 3 hady chatniaj chimii pa artykule 342 KK).
«Ciapier jany ŭzialisia za dziciačuju ankałohiju. Zvalniać nikoha nie zvalniajuć, a ŭ kajdankach vyvodziać. I chto ciapier budzie ratavać dziaciej ad śmierci? Ale kaho ź ich heta niepakoić», — kamientujuć kalehi zatrymanaha.
Represii ŭ dačynieńni da supracoŭnikaŭ RNPC dziciačaj ankałohii i hiematałohii pačalisia paśla hučnaj prajavy salidarnaści miedpracaŭnikoŭ z paciarpiełymi ad hvałtu padčas žnivieńskich pratestaŭ 2020 hoda.
U listapadzie 2020 była zvolnienaja dyrektarka centra Natalla Kanapla. Na jaje miesca pastavili Anžaliku Soncavu.
Jak zhadvajuć supracoŭniki RNPC, zvalnieńnie Natalli Kanapli było ŭmovaj taho, što ŭłady nie zakryjuć centr naohuł.
31 śniežnia 2021 hoda z kalektyvam RNPC sustrakaŭsia Łukašenka, 1 červienia 2022 hoda tudy pryjazdžała jaho pravaja ruka Natalla Kačanava.
Kaśpiaroviča pierad hibiellu dapytvali ŭ polskaj kontrraźviedcy — raspytvali pra vizy dla ahientaŭ AAC z pašpartami prykryćcia i pra Bulbu29
Kamientary