Vojski Azierbajdžana zajšli ŭ Łačyn, jaki 30 hadoŭ kantralavała Armienija
Azierbajdžanskaja armija raźmiaściłasia ŭ Łačynie i siołach Zabuch i Sus.
Azierbajdžanskija vajskoŭcy zajšli ŭ horad Łačyn, jaki z 1992 hoda ŭ vyniku vajny ŭ Nahornym Karabachu znachodziŭsia pad kantrolem Armienii. Pra heta paviedamiŭ prezident Azierbajdžana Ilcham Alijeŭ u tvitary.
«Siońnia, 26 žniŭnia, my, azierbajdžancy, viarnulisia ŭ horad Łačyn. Azierbajdžanskaja armija raźmiaściłasia ŭ Łačynie. Vioski Zabuch i Sus byli ŭziatyja pad kantrol. Vinšuju ŭsich ludziej Łačyna i Azierbajdžana z hetym padziejaj», — havorycca ŭ jaho paviedamleńni.
Raniej rasijskija vajskoŭcy pieradali Azierbajdžanu kantrol nad nasielenymi punktami Łačyn, Zabuch i Sus — heta značyć, faktyčna addali Baku kantrol nad Łačynskim kalidoram — adzinym naziemnym maršrutam, jaki złučaje Armieniju z Nahornym Karabacham u tych miežach, u jakich jon isnavaŭ u saviecki čas jak aŭtanomnaja vobłaść u składzie Azierbajdžana. Niepasrednaj miažy z hetaj vobłaściu tahačasnaja Armianskaja SSR nie mieła.
U adpaviednaści z pahadnieńniem, padpisanym pamiž Armienijaj i Azierbajdžanam paśla vajny ŭ Nahornym Karabachu ŭ 2020 hodzie, abiedźvie krainy pavinny byli pabudavać darohi ŭ abychod Łačynskaha kalidora na praciahu troch hadoŭ.
Azierbajdžan užo zdaŭ svoj maršrut u ekspłuatacyju i patrabavaŭ ad Armienii zrabić toje ž samaje, a ad Rasii — vyvieści svaich «miratvorcaŭ».
Varta adznačyć, što paśla pačatku vajny va Ukrainie, Maskva była zmušanaja pierakinuć častku «miratvorčaha» kantynhientu z Nahornaha Karabacha va Ukrainu.
Ciapier čytajuć
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»6
Kamientary