Refierendumy ab dałučeńni da Rasii «ŁNR» i «DNR», vierahodna, adkładzienyja z-za vajennych niaŭdač
Refierendumy ŭ akupavanych rehijonach Ukrainy akazalisia «strašyłkami» dla Kijeva, padrychtoŭka da hałasavańnia naohuł nie viadziecca, daviedaŭsia kanał «Možiem objaśniť». U Maskvie śćviardžajuć, što refierendumy buduć, ale daty nie nazyvajuć.
Refierendumy ŭ «DNR» i «ŁNR» i na inšych akupavanych terytoryjach, «chutčej za ŭsio, nie buduć sumiaščać z adzinym dniom hałasavańnia ŭ RF 11 vieraśnia», pišuć sa spasyłkaj na Administracyju prezidenta RF «Viedomosti». Jany tłumačać, što vojski pakul nie zaniali ŭsiu Danieckuju vobłaść. Ale, jak vyśvietliŭ «MO», arhanizacyja plebiscytu naohuł prypynienaja.
Nijakaj aktyŭnaści na miescy nie nazirajecca: biuleteni nie drukujucca, aktyŭnaja prapahandysckaja praca taksama nie viadziecca. Nijakich navin ab refierendumie niama na sajcie «CVK DNR». Pa telefonach, nazvanych u kantaktach CVK, nichto nie adkazvaje. Sajt CVK ŁNR nie abnaŭlaŭsia z sakavika.
Krynicy va ŭsich dumskich partyjach paviedamili «MO», što da hetaha času nie atrymlivali ad AP nijakich instrukcyj adnosna adkryćcia svaich adździaleńniaŭ na akupavanych terytoryjach Ukrainy.
Nijakich mietadyčak ad AP nie atrymlivali i ŭ prapahandysckich miedyja, paviedamili try krynicy «MO», jakija pracujuć u dziaržSMI. «Što tyčycca municypalnych vybaraŭ, to mietady aśviatleńnia daviedzienyja da karespandentaŭ — paviedamleńni ab parušeńniach tolki sa spasyłkaj na CVK, abo aficyjny naziralny štab, abo palicyju. A nakont refierendumaŭ nijakich rekamiendacyj dahetul niama. Kažuć, što ŭ najbližejšy čas i nie budzie. Akredytacyja žurnalistaŭ taksama nie pravodzicca», — kaža supracoŭnik bujnoha infarmahienctva.
Palittechnołah, jaki supracoŭničaje z AP, na ŭmovach ananimnaści taksama raspavioŭ, što padrychtoŭka da refierendumaŭ prypynienaja. «Viadoma, niama nijakaj harantyi, što hałoŭny [Uładzimir Pucin] zaŭtra raptam vyjdzie i skaža: pravodzim refierendum 11 vieraśnia». Ale na aficyjnych uzroŭniach ciapier usia dziejnaść pa refierendumach prypynienaja», śćviardžaje surazmoŭca «MO».
Ideja refierendumu na akupavanych terytoryjach źjaviłasia dla zapałochvańnia ŭkrainskich uładaŭ, kab tyja pajšli na pieramovy z Maskvoj, patłumačyŭ «MO» palittechnołah Kanstancin Kałačoŭ. «Refierendumy byli instrumientam cisku na Kijeŭ. Ja naohuł nie byŭ upeŭnieny ŭ ich praviadzieńni ŭ Chiersonie abo Zaporožžy», — padkreśliŭ jon.
U toj ža čas pieršy namieśnik staršyni Savieta Fiederacyi RF Andrej Turčak zajaviŭ, što refierendumy ŭ samaabvieščanych «DNR» i «ŁNR» ab dałučeńni da Rasii abaviazkova adbuducca. «Heta terytoryja Rasijskaj Fiederacyi, heta rehijony Rasijskaj Fiederacyi. I jany taksama majuć prava być uklučanymi ŭ realizacyju Narodnaj prahramy «Adzinaj Rasii», — pieradajuć słovy Andreja Turčaka «RIA Novosti».
Ale nijakaj daty jon nie nazvaŭ.
Raniej «Mieduza» raspaviadała, što ŭ Kramli pakul nie admaŭlajucca ad praviadzieńnia refierendumaŭ u samaabvieščanych «ŁNR» i «DNR», a taksama na akupavanych terytoryjach Zaparožskaj i Chiersonskaj abłaściej 11 vieraśnia, u adziny dzień vybaraŭ u Rasii.
Adnak, pavodle płanu, refierendumy pavinny byli adbycca, kali vojski RF buduć całkam kantralavać Danieckuju vobłaść — u tych miežach, jakija byli ŭ jaje ŭ składzie Ukrainy. Pa padlikach «Mieduzy», ciapier Rasija kantraluje kala 60% Danieckaj vobłaści — i ŭ apošni čas hetaja ličba praktyčna nie raście.
Krynicy «Mieduzy» paviedamlajuć, što ŭ Administracyi prezidenta RF pracujuć i nad zapasnym scenaryjem — pa im hałasavańnie projdzie zimoj.
Kamientary