Hety bijatłanist — adzin ź lepšych u Biełarusi. Jaho historyja kachańnia raskałoła žanočuju zbornuju
Anton Smolski i Dzinara Alimbiekava — adny ź lidaraŭ biełaruskaha bijatłonu. Maładzionaŭ taksama źviazvaje supiarečlivaja historyja kachańnia, jakaja niekali raskałoła žanočuju zbornuju. «Naša Niva» raskazvaje, što viadoma pra adnosiny biełaruskich alimpijcaŭ.
Pačniem ź bijahrafii bijatłanistaŭ. Smolski rodam z ahraharadka Piasočnaje, što ŭ Kapylskim rajonie. Sportam pačaŭ zajmacca ŭ 6 kłasie i ŭžo praz hod vyjhraŭ rajonnyja spabornictvy pa krosie. Dahetul, zhodna sa słovami svajho pieršaha treniera, padtrymlivaje pieršuju spartovuju bazu, dzie treniravaŭsia. I jašče adna detal: chacia i moh pastajanna kamunikavać z baćkam, ale ŭsio-taki vyras u niapoŭnaj siamji.
Paśla zakančeńnia škoły Smolski źjechaŭ u Raŭbičy, kab treniravacca z nacyjanalnaj zbornaj, chacia i nie mieŭ pry hetym jarkich vynikaŭ i vysokich miescaŭ na respublikanskich turnirach. Asabisty trenier bijatłanista tłumačyŭ heta svajoj vieraj u jaho. I spartoviec sapraŭdy «streliŭ». Z 2017 hoda Smolski ŭ nacyjanalnaj zbornaj, jaho pieršaja Alimpijada — hulni ŭ Pchiončchanie 2018 hoda.
Ciapierašniaja niaviesta Antona Dzinara Alimbiekava z tych hulniaŭ pryviezła załaty miedal žanočaj estafiety. Napałovu kazaška, Alimbiekava pierajechała ŭ Biełaruś i rasła ŭ Čavusach. Siarod samych prykmietnych uznaharod Dzinary — tytuł čempijonki śvietu siarod junijoraŭ i bronza čempijanata Jeŭropy.
Prykładna na čas hulniaŭ u Pchiončchanie prychodzicca pieršy šlub Smolskaha, ad jakoha ŭ jaho jość trochhadovaja dačka Alaksandra. Bijatłanist zapeŭnivaje, što chacia ŭ jaho hrafiku ciažka znajści čas na dačku, jon starajecca ź joj bačycca. Ź minułaj žonkaj, kaža Smolski, u jaho narmalnyja adnosiny biez kanfliktaŭ. Pryčyna ž razryvu, pa słovach bijatłanista, vyhladaje tak:
«Składana spałučyć prafiesijny sport ź niečym jašče, nie važna, heta asabistaje žyćcio, niejki inšy zaniatak ci vučoba. Kali ty prafiesijna zajmaješsia sportam, takim, jak bijatłon, to ŭvieś svoj čas ty traciš na sport, u volny čas ty śpiš ci adpačyvaješ. Nie zastavałasia času na asabistaje žyćcio, viadoma, uźnikali niejkija kanflikty, nieparazumieńni, nie atrymałasia ŭ nas».
Praz razvod, jak raskazvaje Smolski, jon byŭ u duža ciažkim psichałahičnym stanie i tolki da nastupnaha siezona zdoleŭ adnavić pravilny nastroj dla spabornictvaŭ. Dalej byŭ paśpiachovy pieradalimpijski siezon, dzie Anton uziaŭ šeść miedaloŭ na etapach Kubka śvietu, i alimpijada ŭ Piekinie, adkul Smolski pryvioz srebra, niahledziačy na ciažkija klimatyčnyja ŭmovy. Praz vajnu va Ukrainie praryŭny siezon skončyŭsia «banam» na mižnarodnych spabornictvach, i apošnim turniram siezona dla Smolskaha staŭ adkryty Kubak Rasii va Ufie.
Ź Dzinaraj Alimbiekavaj, kaža bijatłanist, jon staŭ kamunikavać niedzie ŭ 2014 hodzie. Ale zapeŭnivaje: da 2019 hoda jany ź dziaŭčynaj nie simpatyzavali adno adnamu i paźbiahali niejkich znosin. Bolš ciesnyja stasunki ŭ ich z Alimbiekavaj pačalisia z kavidnaha leta-2020, kali bijatłonnaja zbornaja pravodziła ŭvieś svoj čas u trenirovačnym łahiery ŭ Raŭbičach.
Razam ź dziaŭčynaj, raskazvaje Smolski, jany lubiać dapamahać baćkam u vioscy ci mohuć schadzić u pachod z pałatkaj. Što da sportu, to ad jaho nie abstrahavacca: spartyŭnym temam u hutarkach pary pryśviečana 90% času. Viasielle płanujuć adyhrać chutka, da pačatku zimy.
Idealnaja para?
U 2021 hodzie hety raman staŭ pryčynaj surjoznaha kanfliktu ŭ žanočaj nacyjanałcy pa bijatłonie. Kachanaja Smolskaha pačała redka źjaŭlacca na kamandnych zdymkach i na ahulnych mierapryjemstvach, a inšaja zornaja bijatłanistka, Hanna Soła, navat abraziła dziaŭčynu na zdymkach dla sacsietak i nie zaprasiła jaje na ŭłasnaje viasielle.
Što ž Dzinara zrabiła nie tak? Spačatku mierkavali, nibyta za kanfliktam staić historyja ź listom spartoŭcaŭ u padtrymku Łukašenki, jaki ŭ zbornaj padpisali ŭsie, akramia Soły. Ale potym vyśvietliłasia, što ŭ hetaj spravie nie abyšłosia biez Smolskaha.
Da adnosin z Alimbiekavaj Anton byŭ u šlubie, ad jakoha maje dzicia, i jon heta paćvierdziŭ u niadaŭnim filmie na dziaržtelebačańni. Žonkaj Smolskaha taksama była bijatłanistka, Darja Ijerapies, jakuju šmat chto viedaŭ u žanočaj zbornaj.
Da 2018 hoda karjera Ijerapies składvałasia dobra: udzieł u junijorskich Alimpijskich hulniach, šostaje miesca na junijorskim čempijanacie śvietu. Ale potym treniroŭki časova daviałosia prypynić, bo ŭ dziaŭčyny znajšli rak ščytapadobnaj załozy — na ščaście, stadyja była rańniaja, i spartsmienka chutka papraviłasia. U vieraśni 2018 hoda Darja znoŭ pastaviła bijatłon na paŭzu, bo zaciažaryła ad Antona Smolskaha, i praz dva miesiacy Anton zrabiŭ joj prapanovu. Maładyja ažanilisia, letam 2019 hoda ŭ ich naradziłasia dzicia, ale ŭžo praz hod Smolski i Ijerapies raptoŭna raźvialisia.
Insajdarskija krynicy roznych miedyja (nie tolki biełaruskich) śviedčać, što Dzinara i Anton pačali sustrakacca, jašče kali apošni byŭ u šlubie ź Ijerapies. Kažuć, u toj čas u sužencaŭ i tak usio išło da razvodu, ale ž jaho dakładnaja pryčyna nieviadomaja.
U hetaj situacyi žanočaja častka zbornaj stała na pazicyju Darji, a Dzinaru bijatłanistki paličyli razłučnicaj. Sama Alimbiekava sprečnuju situacyju kamientavała tak: «Ja pierastała kamunikavać ź ludźmi, jakija nie robiać mianie lepš, a znosiny ź imi zabirajuć šmat enierhii. Pryjšli ludzi, jakija zdoleli raspluščyć vočy šmat na jakija rečy. Kali mianie niama na niejkim fota, značyć, ja była na treniroŭcy i nie zmahła prysutničać. U inšych kamandach takoje taksama byvaje. Heta indyvidualny vid sportu, nie zaŭsiody my možam być razam. U prafiesijnym płanie ŭ nas u kamandzie dobryja adnosiny».
Jak Anton Smolski, tak i Dzinara Alimbiekava naležać da tych spartsmienaŭ, jakija nieadnarazova vystupali ŭ padtrymku režyma Łukašenki. Jany padpisvali praŭładny list spartsmienaŭ, prysutničali na sustrečy z kiraŭnikom NAK Viktaram Łukašenkam, naviedvali vystup jaho baćki, prymierkavany da 3 lipienia. Publičnych spačuvańniaŭ ukrainskamu narodu, što pakutuje ad ahresii z udziełam Biełarusi, praŭładnyja bijatłanisty nie vykazali.
«Naša Niva» — bastyjon biełaruščyny
PADTRYMAĆ«Ja ščaśliŭčyk!» Jak 40-hadovy baćka troch dziaciej Kalcoŭ syšoŭ ź siamji dziela 23-hadovaj Aryny Sabalenka
«Azaronki — heta ahresiŭnaja mienšaść. A žyć my budziem u Biełarusi». Znakamity valejbalist vyvučaje psichałohiju i mnohaje pieraasensavaŭ
«Zrabiła b toje ž samaje». Jak žyvie spartsmienka, što syšła z pjedestała, kali zajhraŭ nie jaje himn
Asudžany za «Hajun» da chimii brat Ihara Łosika ŭciok ź Biełarusi3
Kamientary