Uciečka fajłaŭ Uber: kampanija parušała zakony i karystałasia dapamohaj palitykaŭ
Brytanskaja hazieta Guardian atrymała dostup da bolš čym 124 tysiač dakumientaŭ, jakija pakazvajuć, za košt čaho hetaja kampanija prasoŭvała svoj servis u śviecie. Reparciory razbłytali hetuju historyju razam z kalehami jašče z 40 vydańniaŭ pa ŭsim śviecie.
Materyjały, što trapili ŭ ruki žurnalistaŭ, achoplivajuć pieryjad z 2013 pa 2017 hod, kali kampanijaj kiravaŭ jaje suzasnavalnik Trevis Kałanik. Zhodna z fajłami, kali havorka išła pra prasoŭvańnie Uber u novych haradach śvietu, Kałanik byŭ hatovy iści na parušeńnie zakonaŭ i pravił pracy taksi, a taksama i na cisk na palitykaŭ i bahatych ludziej, i najvyšejšy mieniedžmient kampanii viedaŭ pra heta.
Daśje Uber uklučaje ŭ siabie bolš za 83 tysiačy elektronnych listoŭ i paviedamleńniaŭ u miesiendžarach, u tym liku i davoli ščyruju kamunikacyju pamiž Kałanikam i top-mieniedžmientam kampanii. Taksama ŭ fajłach jość pierapiska pamiž kiraŭnikom Uber i ciapierašnim francuzskim lidaram Makronam, jaki tajna dapamahaŭ kampanii, kali byŭ ministram ekanomiki. Jon padtrymlivaŭ ciesny kantakt z supracoŭnikami hihanta i navat paviedamlaŭ, što zaklučyŭ tajnaje pahadnieńnie z apanientami kampanii va ŭładzie.
I heta nie adziny viadomy palityk, čyjo imia źjaviłasia ŭ daśje. Naprykład, ciapierašni amierykanski lidar Džo Bajden sustrakaŭsia z Kałanikam na forumie ŭ Davosie, kali byŭ vice-prezidentam krainy. Paśla toj sustrečy jon źmianiŭ svoj vystup na forumie i, spasyłajučysia na Kałanika, vydzieliŭ pierśpiektyvy raźvićcia servisu z punktu hledžańnia stvareńnia pierśpiektyŭnych pracoŭnych miescaŭ.
Akramia hetych vypadkaŭ, top-mieniedžary Uber sustrakalisia ź irłandskim premjeram Endaj Kieni, izrailskim premjeram Bińjaminam Nietańjachu i brytanskim kancleram kaznačejstva (ministram finansaŭ) Džordžam Osbarnam, a taksama sprabavali znajści kantakt ź inšymi palitykami.
Uvohule, u hihanta dobra atrymoŭvałasia znachodzić niefarmalnyja kantakty ź ludźmi va ŭładzie i akazvać upłyŭ na padziei praź siabroŭ ci pasrednikaŭ. U dadatak, kampanija traciła sotni tysiač dalaraŭ na hanarary viadomym vučonym, kab tyja paćvierdzili śviedčańni Uber pra pieravahi jaje ekanamičnaj madeli.
Časam Uber navat uprošvaŭ urady pierapisvać zakony, što mieła doŭhaterminovy efiekt. Kiroŭcy Uber ciarpieli praz žorstkija napady (byli i zabojstvy) z boku inšych taksistaŭ, što ciarpieli straty ad kankurencyi z kampanijaj.
Supracoŭniki hihanta dobra razumieli, što adbyvajecca. Va ŭnutranaj pierapiscy jany kazali pra «niezakonny status» kampanii ŭ šmat jakich krainach: Turcyja, PAR, Ispanija, Čechija, Šviecyja, Francyja, Hiermanija, Rasija, Tajłand i Indyja.
Pravaachoŭnyja orhany roznych krain šukali mahčymaści zmahacca z samaŭpraŭstvam Uber. Kampanija, u svaju čarhu, raspracavała składanyja mietady, kab pieraškodzić pravaachoŭnikam. Adzin ź ich nasiŭ nazvu «vyklučalnik» i dziejničaŭ tak: kali ŭ ofisie Uber prachodziŭ vobšuk, kiraŭniki kampanii terminova dasyłali supracoŭnikam instrukcyi, jak adklučyć dostup da asnoŭnych infarmacyjnych sistem, kab ułady nie mahli sabrać dokazy.
«Usie našy kiroŭcy — biełarusy. Płacim im nie mienš za $1000 «čystymi». Jak biełarus adkryŭ słužbu taksi ŭ Poznani
Ciapier čytajuć
U Biełarusi zaćvierdzili praviły evakuacyi kaštoŭnaściaŭ na vypadak vajny: cehłu z Bresckaj krepaści z nadpisami buduć ratavać pierš za karciny Šahała i Sucina1313
Kamientary