Žurnalisty nazvali imia supracoŭnika KDB — mahčymaha kiraŭnika pasadki samalota z Pratasievičam

U studzieni ZŠA vystavili abvinavačvańni ŭ pavietranym piractvie suprać hiendyrektara «Biełaeranavihacyi» Leanida Čura, jaho namieśnika Aleha Kaziučyca i dvaich supracoŭnikaŭ KDB Biełarusi, adzin ź jakich niepasredna kamandavaŭ avijadyśpietčarami na miescy, a druhi kaardynavaŭ apieracyju pa telefonie.

Supracoŭniki KDB u relizie paznačanyja tak: Andrey Anatolievich Lnu and Fnu Lnu (abrevijatura ad first name unknown, last name unknown).

Žurnalisty «Hrani.Ru» pryjšli da vysnovy, što proźvišča Andreja Anatoljeviča — Jurevič.

U adkrytych krynicach jany znajšli zhadku pra supracoŭnika KDB z takim imiem i imiem pa baćku. U vypusku haziety «Homielskaja praŭda» ad 8 studzienia 2015 hoda havorycca, što načalnik adnaho z adździełaŭ Upraŭleńnia KDB pa Homielskaj vobłaści Andrej Anatoljevič Jurevič uznaharodžany Hanarovaj hramataj abłvykankama.

Jak paviedamili «Hraniam» u arhanizacyi byłych biełaruskich siłavikoŭ BYPOL, Jurevič da 2017 hoda (ź jakoha — nie ŭdakładniajecca) žyŭ u Homieli i słužyŭ u Homielskim upraŭleńni KDB, a z taho času i pa ciapierašni słužyć u padraździaleńniach KDB u Minsku.

Jaho baćka, pa infarmacyi «Hrani.Ru», — viadomy biełaruski futbolny trenier Anatol Jurevič, jaki ŭ 2011-2013 hadach byŭ spartovym dyrektaram Fiederacyi futboła Kazachstana, a z 2017 hoda treniruje futbolny kłub «Enierhietyk-BDU».

Dziakujučy chakierskaj hrupie «Kibierpartyzany» žurnalisty vyśvietlili, što 23 maja 2021 hoda, u dzień pasadki samalota, mašyna Jureviča była zaŭvažanaja na vyjeździe sa stalicy na trasie M6 Minsk-Hrodna.

U niekalkich chvilinach jazdy znachodzicca kanśpiratyŭnaja kvatera KDB (kartu abjektaŭ KDB «Kibierpartyzany» apublikavali 22 maja, za sutki da zatrymańnia Pratasieviča).

Mašyna Jureviča znachodziłasia na vyjeździe ŭ 11:52 pa miascovym časie. U 12:33 piłoty samalota Ryanair atrymali ad dyśpietčaraŭ aeraporta «Minsk» paviedamleńnie pra bombu na borcie.

Mašyna Jureviča rehularna, pišuć «Hrani.Ru», źjaŭlałasia na hetaj uskrainie Minska z 2017 hoda i začaściła tudy ŭ mai-červieni 2021-ha, kali razhortvalisia padziei vakoł Pratasieviča. Pa najaŭnaj infarmacyi, aŭtamabil tam parkavaŭsia.

Pavodle «Hrani.Ru», tak było 7 maja, za dva dni da pajezdki Pratasieviča i Sapiehi ŭ Afiny na Delfijski ekanamičny forum, u jakim udzielničała Śviatłana Cichanoŭskaja. U nastupny raz mašyna Jureviča była zaŭvažanaja na tym ža vyjeździe ź Minska 16 maja — u hety dzień Pratasievič i jaho dziaŭčyna adpravilisia na vostraŭ Kryt, dzie adpačyvali niekalki dzion. Krynicy ŭ hrečaskaj vyviedsłužbie EYP paviedamlali miascovaj presie, što jak minimum troje nieviadomych sačyli za Pratasievičam u Afinach.

Hrečaski čynoŭnik raspavioŭ vydańniu Vice News, što na Krycie nazirańnie za žurnalistam praciahnuli ludzi, jakich ułady Hrecyi ličać rasijskimi abo biełaruskimi vyviednikami. Sam Pratasievič paśpieŭ paviedamić z aeraporta Afin pra padazronaha mužčynu, jaki pa-rusku źviarnuŭsia da jaho «ź niejkim tupym pytańniem» i pasprabavaŭ sfatahrafavać jaho dakumienty.

Paśla aryštu Pratasieviča Jurevič pryjazdžaŭ na tuju ž samuju ŭskrainu Minska 29 maja, 2 i 12 červienia.

Arhumienty žurnalistaŭ nielha nazvać adnaznačna pierakanaŭčymi: heta supadzieńnie imia, imia pa baćku supracoŭnika KDB i mahčymaje znachodžańnie jaho na kanśpiratyŭnaj kvatery.

I jašče adzin uskosny dokaz.

Jurevič zajmaŭsia «Maładym frontam». U 2007 hodzie jon, pavodle paviedamleńnia «Chartyi-97», budučy ŭ zvańni kapitana, pravodziŭ u Homieli pieratrus u ofisie abłasnoj arhanizacyi Abjadnanaj hramadzianskaj partyi. Śledčyja dziejańni pravodzilisia ŭ miežach kryminalnaj spravy suprać dvaich aktyvistaŭ ruchu «Małady front» Andreja Cianiuty z Homiela i Kiryła Atamančyka sa Žłobina.

Jurevič taksama moža mieć dačynieńnie da pieraśledu ŭ 2010-2011 hadach aktyvistki «Maładoha frontu» Nasty Daškievič (Pałažanka). Jana była ŭ liku 42 fihurantaŭ kryminalnaj spravy ab masavych biesparadkach 19 śniežnia 2010 hoda, paśla prezidenckich vybaraŭ. Daškievič tady była namieśnicaj staršyni «Maładoha frontu».

Pavodle «rejestru asob, jakija majuć dačynieńnie da palityčna matyvavanaha pieraśledu», jaki viadzie Biełaruski dakumientacyjny centr, apieratyŭnik 9-ha adździeła UKDB pa Hrodzienskaj vobłaści A. A. Jurevič skłaŭ na jaje pratakoł zatrymańnia i ŭdzielničaŭ u rasśledavańni spravy. Udzieł Jureviča ŭ kryminalnaj spravie, jakuju rasśledavali ŭ Minsku, žurnalisty tłumačać tym, što ŭ stalicy, vierahodna, u razhar pratestaŭ nie chapała kadraŭ i tudy pryciahvali siłavikoŭ z rehijonaŭ.

«Pratasievič u junactvie taksama byŭ u «Maładym froncie» i ŭžo tady sutykaŭsia ź pieraśledam KDB. Nie vyklučana, što Jurevič udzielničaje ŭ jaho bijahrafii jašče z tych časoŭ», — pišuć «Hrani.Ru».

Polskija śpiecsłužby: Samalot z Pratasievičam dapamahaŭ sadžać aficer KDB. A što kazali biełarusy?

Sapieha adpraŭlajuć u kałoniju na 6 hadoŭ, niahledziačy na supracu jaje i Pratasieviča sa śledstvam

Safija Sapieha: Pratasieviča dla mianie bolš nie isnuje

• 42
• 0
• 1
• 1
• 3
• 1
• 13
• 0