Izrail admoviŭ u absłuhoŭvańni samalotaŭ — «Biełavija» admianiła rejsy ŭ Tel-Aviŭ da kanca kastryčnika
Avijacyjnyja ŭłady Izraila admovili «Biełavija» ŭ absłuhoŭvańni samalotaŭ u aeraporcie «Ben Huryjon», u suviazi z čym avijakampanija vymušanaja skasavać raniej zapłanavanyja rejsy ŭ Tel-Aviŭ. Izrail paviedamiŭ pra svajo rašeńnie, niahledziačy na toje što pieršapačatkova, 15 maja, byŭ vydadzieny aficyjny dazvoł na paloty i zaćvierdžanaja prahrama rejsaŭ pa novym raskładzie (z techničnaj pasadkaj u Baku).
«Na padstavie vydadzienaha dazvołu avijakampanija pačała prodaž avijabiletaŭ na novyja rejsy, pieršy ź jakich byŭ zapłanavany ŭžo na 2 červienia. Raptoŭnaje rašeńnie izrailskaha boku admianić raniejšyja damoŭlenaści vyklikaje ździŭleńnie», — adznačyŭ hienieralny dyrektar avijakampanii Ihar Čarhiniec.
U suviazi z admovaj Izraila avijakampanija vymušanaja skasavać usie zapłanavanyja rejsy až da kanca letniaha siezona (27 kastryčnika 2022 hoda).
Pasažyram, jakija nabyli avijabilety na rejsy Minsk — Tel-Aviŭ —Minsk raniej, a taksama na rejsy pa novym maršrucie praz Baku, harantujecca viartańnie koštu ŭ poŭnym abjomie.
Avijakampanija «Biełavija» vykonvała rehularnyja paloty ź Minska ŭ Tel-Aviŭ z 1996 hoda.
«My škadujem ab tym, što zapłanavanyja sustrečy svajakoŭ nie adbuducca, hramadzianie Izraila nie zmohuć prylacieć u Biełaruś i pravieści śpiakotnaje leta ŭ bolš miakkim klimacie, a hramadzianie Biełarusi — azdaravicca na kurortach Čyrvonaha i Miortvaha moraŭ, — skazaŭ Ihar Čarhiniec. — My sapraŭdy škadujem ab mahčymych stratach, jakija paniasuć usie ŭdzielniki turystyčnaj haliny Biełarusi i Izraila ŭ vyniku admieny raniej zabraniravanych i apłačanych puciovak, adnak jašče raz źviartajem uvahu na toje, što da takoj situacyi pryviało adnabakovaje rašeńnie izrailskaha boku».
Kamientary