Ізраіль адмовіў у абслугоўванні самалётаў — «Белавія» адмяніла рэйсы ў Тэль-Авіў да канца кастрычніка
Авіяцыйныя ўлады Ізраіля адмовілі «Белавія» ў абслугоўванні самалётаў у аэрапорце «Бэн Гурыён», у сувязі з чым авіякампанія вымушаная скасаваць раней запланаваныя рэйсы ў Тэль-Авіў. Ізраіль паведаміў пра сваё рашэнне, нягледзячы на тое што першапачаткова, 15 мая, быў выдадзены афіцыйны дазвол на палёты і зацверджаная праграма рэйсаў па новым раскладзе (з тэхнічнай пасадкай у Баку).
«На падставе выдадзенага дазволу авіякампанія пачала продаж авіябілетаў на новыя рэйсы, першы з якіх быў запланаваны ўжо на 2 чэрвеня. Раптоўнае рашэнне ізраільскага боку адмяніць ранейшыя дамоўленасці выклікае здзіўленне», — адзначыў генеральны дырэктар авіякампаніі Ігар Чаргінец.
У сувязі з адмовай Ізраіля авіякампанія вымушаная скасаваць усе запланаваныя рэйсы аж да канца летняга сезона (27 кастрычніка 2022 года).
Пасажырам, якія набылі авіябілеты на рэйсы Мінск — Тэль-Авіў —Мінск раней, а таксама на рэйсы па новым маршруце праз Баку, гарантуецца вяртанне кошту ў поўным аб'ёме.
Авіякампанія «Белавія» выконвала рэгулярныя палёты з Мінска ў Тэль-Авіў з 1996 года.
«Мы шкадуем аб тым, што запланаваныя сустрэчы сваякоў не адбудуцца, грамадзяне Ізраіля не змогуць прыляцець у Беларусь і правесці спякотнае лета ў больш мяккім клімаце, а грамадзяне Беларусі — аздаравіцца на курортах Чырвонага і Мёртвага мораў, — сказаў Ігар Чаргінец. — Мы сапраўды шкадуем аб магчымых стратах, якія панясуць усе ўдзельнікі турыстычнай галіны Беларусі і Ізраіля ў выніку адмены раней забраніраваных і аплачаных пуцёвак, аднак яшчэ раз звяртаем увагу на тое, што да такой сітуацыі прывяло аднабаковае рашэнне ізраільскага боку».
Каментары