«Prapahanda pierabrała z nahniatańniem temy nacyzmu». Ciapier u Kramli nie viedajuć, jak skončyć vajnu
Va ŭnutrypalityčnym błoku administracyi prezidenta Rasii (AP) pryjšli da vysnovy: ciapier niama «dobrych pijar-scenaryjaŭ vychadu» z vajny, jakija nie pryviali b da padzieńnia rejtynhu ŭłady. Pra heta «Mieduzie» paviedamili try krynicy, blizkija da AP.
Takija «scenaryi» va ŭnutrypalityčnym błoku pačali prapracoŭvać niekalki tydniaŭ tamu.
«Pahladzieli, pakrucili — niejkaha zrazumiełaha scenara nie prahladajecca. Tamu [hramadskuju] dumku da mahčymaha praviadzieńnia pieramoŭ [i zaklučeńnia miru] vyrašyli nie rychtavać, puścili ŭsio na samaciok», — tłumačyć adzin z surazmoŭcaŭ «Mieduzy».
Krynicy «Mieduzy» śćviardžajuć: u Kramli ŭpeŭnienyja, što bolšaść rasijan surjozna ŭsprymaje vajnu jak «baraćbu z nacystami i nacyzmam». U paćviardžeńnie hetaha jany spasyłajucca na vyniki zakrytych sacyjałahičnych apytańniaŭ (rasijskija ŭłady šmat hadoŭ vykarystoŭvajuć ich).
Pry hetym nijakich dakładnych niezaležnych danych, jakija paćviardžajuć hipotezu pra «vajaŭničuju bolšaść» rasijan, niama. Publikujucca roznyja sacyjałahičnyja apytańni pra staŭleńnie rasijan da vajny, mnohija ź jakich pakazvajuć, što bolšaść žycharoŭ nibyta padtrymlivaje «śpiecapieracyju».
Adnak mnohija navukoŭcy padkreślivajuć: va ŭmovach prapahandy, cenzury i represij takija daśledavańni ci naŭrad adlustroŭvajuć realnaść.
Tym nie mienš u AP praciahvajuć aryjentavacca na ŭłasnyja danyja, jakija śviedčać, pa śćviardžeńni krynic «Mieduzy», ab vajaŭničym nastroi nasielnictva Rasii. U pryvatnaści, na dumku Kramla, adnoj z samych surjoznych pieraškod dla «vychadu hramadstva z vajny» moža stać «pazicyja mnohich pradstaŭnikoŭ siaredniaha kłasa», jaki nibyta padtrymlivaje «śpiecapieracyju». Spasyłajučysia na ŭsio tyja ž zakrytyja apytańni,
surazmoŭcy «Mieduzy», śćviardžajuć, što hetyja «pradstaŭniki siaredniaha kłasa» upeŭnienyja: «U vajnie treba iści da pieramožnaha, kali ŭžo jaje pačali — da Kijeva ci navat da Lvova. Adstupać nielha».
«Pakul paduška nazapašvańniaŭ u takich ludziej jość. Prama ciapier abnaŭlać techniku bolšaści ź ich nie treba. Dachody dazvalajuć praktyčna nie zaŭvažać rostu koštaŭ na pradukty charčavańnia. Zatoje jany adčuvajuć, što vystupajuć za svaju krainu, za spraviadlivaść», — tłumačyć adna z krynic.
Uskosna hetyja słovy mohuć paćviardžać vyniki apytańnia tysiačy žycharoŭ Maskvy, praviedzienaha kampanijaj Russian Field pa zamovie apazicyjnaha palityka Ramana Junemana.
Siarod hrupy ludziej, dachody jakich dazvalajuć kupić «praktyčna ŭsio», za praciah «śpiecapieracyi» vykazalisia 62%, za mirnyja pieramovy — 29%.
U hrupie ludziej z dachodami, jakija dazvalajuć kupić bytavuju techniku, padtrymka praciahu vajny składaje 54%, pieramovaŭ — 37%.
Pry hetym siarod hramadzian, dachodaŭ jakich nie chapaje navat na pradukty, za vajnu vykazvajucca tolki 40%, a za mirnyja pieramovy — 43%.
Adnak sacyjołah Ryhor Judzin u razmovie z «Mieduzaj» padkreśliŭ, što takija vyniki mohuć tłumačycca tym, što «značnaja častka rasijskaha siaredniaha kłasa — heta siłaviki i siaredniaha ŭzroŭniu čynoŭniki»: «Heta značyć, heta pramyja bienieficyjary režymu. Abo tyja, chto viedaje, kali treba pakazvać łajalnaść».
Iluzija pratestu
Krynicy «Mieduzy» zajaŭlajuć, što na takim fonie ŭ Kramli «pabojvajucca mahčymaj niezadavolenaści» adstupleńniem vojskaŭ i pieramovami.
Pa acency ŭładaŭ, jana nibyta moža vylicca navat u vuličnyja pratesty.
Hetuju hipotezu surazmoŭcy «Mieduzy» tłumačać tym, što
rasijskaja prapahanda «pierabrała z nahniatańniem temy nacyzmu» va Ukrainie: «Heta zanadta mocnyja tryhiery, heta ažyŭleńnie pamiaci pra Vialikuju Ajčynnuju, kali vajavali z nacystami. Hetuju pamiać pieścili zanadta doŭha».
Pry hetym publična supracoŭniki AP padtrymlivajuć hetuju rytoryku, pakolki ličać, što z hramadskaj dumkaj «spračacca pozna», a vajavać usio roŭna daviadziecca da niejkaha vyniku, jaki možna abjavić «pieramohaj».
Razam z tym dva palittechnołahi (adzin ź ich raniej supracoŭničaŭ z AP, druhi supracoŭničaje z Kramlom da hetaha času) u razmovie z «Mieduzaj» usumnilisia ŭ adekvatnaści takich aściaroh.
«Abapiracca na niejkuju sacyjałohiju ciapier dziŭna. Ludzi, chutčej, pasiŭnyja, jany mohuć być nie suprać vajny, ale i nie za jaje. U Maskvie na mašynach siaredniaha kłasa litar Z niešta nie zaŭvažna. Respandenty vykazvajucca pa iniercyi — navat, moža, nie kryviać dušoj. Ale heta nie vajaŭničaja padtrymka. Sami vajavać hetyja ludzi nie hatovyja», — kamientuje adzin ź ich.
Abodva surazmoŭcy ŭpeŭnienyja, što ŭ vypadku «pryhłušeńnia prapahandy» nijakich pratestaŭ ad prychilnikaŭ vajny čakać nie davodzicca. Pa słovach adnaho ź ich, «hramadzianie pierastanuć dumać i havaryć pra nacystaŭ, całkam pieraklučacca na svaje asabistyja prablemy».
Alena Kaściučenka: U hetaj vajnie vialikaja častka našaj adkaznaści, našaj ciarpimaści da hvałtu. Rasija prasiaknuta hvałtam
Vajna Rasii z Ukrainaj prymušaje biełarusaŭ vyznačacca z «vialikim hieapalityčnym vybaram». I pracesy — na karyść Zachadu
«U Viciebsku zachodziŭ u tralejbus i kazaŭ «Słava Ukrainie!». Ukrainca ŭ 67 hadoŭ pasadzili za kamienty, napisanyja paśla hibieli chrosnaj dački pad abstrełam u Kijevie1010
Kamientary