«Nikakoj čriezvyčajŝiny». Što pisali łukašenkaŭskija ŚMI ŭ dzień uvarvańnia Rasii va Ukrainu
Ranicaj 24 lutaha ŭvieś śviet paralizavała navina — Rasija pačała vajnu suprać Ukrainy. Suśvietnyja ŚMI ŭ režymie anłajn sočać za situacyjaj, jakaja radykalna mianiaje raskład va ŭsim rehijonie. A jak aśviatlajuć uvarvańnie Pucina łukašenkaŭskija ŚMI, jakija tradycyjna stanoviacca lustram pazicyi ŭładaŭ? Sabrali dla vas asnoŭnaje, što treba viedać.
«Sovietskaja Biełoruśsija». Vajna vajnoj, a refierendum — pa raskładzie
Hazieta Łukašenki čakana vyniesła ŭ najhałoŭnaje jaho cytaty pra niaŭdzieł Biełarusi ŭ vajnie suprać Ukrainy i zapeŭnivańni ŭ adsutnaści dla Biełarusi jakich-niebudź pahroz. Pry hetym SB ihnaruje ŭžo anansavanyja novyja sankcyi suprać Biełarusi, jakuju Jeŭropa i ZŠA razhladajuć nie inačaj jak płacdarm Pucina, nad jakim Łukašenka straciŭ kantrol. SB nie zhadvaje i nie kamientuje zajavy Uzbrojenych siłaŭ Ukrainy pra nastup asobnych uzvodaŭ rasijskich siłavikoŭ z terytoryi Biełarusi, zapusk čatyroch balistyčnych rakiet i pieryjadyčnyja vylety viertalotaŭ u bok Ukrainy, jakija, možna mierkavać, vysadžvajuć rasijski desant.
Prapahandysckaje vydańnie stvaraje iluziju, što Łukašenka trymajecca niejtralitetu, a vajna z Ukrainaj — heta ŭsio «zachodnija susiedzi, jakija dziakujučy svaim amierykanskim haspadaram naroščvajuć vajennuju moc la našych miežaŭ i sprabujuć znoŭ raźviazać vajnu va Ukrainie». A viadomaja prapahandystka Ludmiła Hładkaja zapeŭnivaje, što «nikakoj čriezvyčajŝiny» nie adbyvajecca.
Druhaja pa značnaści tema — refierendum, jaki ŭłady pa-raniejšamu źbirajucca pravieści ŭ bližejšuju niadzielu, niahledziačy na toje, što pad bokam idzie vajna. Vydańnie rapartuje, što daterminovaja jaŭka ŭžo pieravysiła 24%. Łukašenka siońnia ŭžo pradrok, što «kali tak pojdzie i dalej, to da niadzieli jaŭka pieravysić 51%, i možna budzie ličyć, što refierendum adbyŭsia, navat da asnoŭnaha dnia hałasavańnia».
Roŭna toj samy paradak i ŭ hałoŭnym dziaržaŭnym infarmahienctvie. Pra šalony kurs dalara i jeŭra, uźlot cenaŭ u biełaruskich kramach, mahčymyja nastupstvy dla biełaruskaj ekanomiki — ni słova.
Treba adznačyć, što vajna Rasii z Ukrainaj aśviatlajecca davoli strymana. Adnaznačnaha słova «vajna» BiełTA paźbiahaje, nazyvajučy dziejańni «śpiecapieracyjaj Rasii» i «situacyjaj va Ukrainie».
Rajonki. Aficery hałasujuć daterminova
Voś tak vyhladaje sajt «Chojnickich navin», haziety pryhraničnaha z Ukrainaj rajona. Asnoŭnyja artykuły pryśviečany daterminovamu hałasavańniu na refierendumie. Dalej — śviatočnyja materyjały da 23 lutaha. Tolki paru navin radkom raskazvajuć pra evakuacyju biełarusaŭ z Ukrainy i płanavy pryzyŭ aficeraŭ zapasu.
Padobnaja karcinka ŭ «Prypiackaj praŭdy», haziety Naraŭlanskaha rajona, taksama pryhraničnaha. Ale jość u hałoŭnych dźvie naviny pra vajnu: zajava Minabarony, što ŭdzieł biełarusaŭ u apieracyjach na Danbasie — fejk, i słovy Łukašenki ab «niedapuščeńni krovapralićcia».
Hałoŭnaja staronka «Lidskaj haziety» taksama pryśviečanaja refierendumu. «Daviarajem abranamu kursu», — rapartuje hazieta. Niekalki navin pra vajnu — heta biurakratyčnyja zajavy Łukašenki i Pucina.
Barysaŭskaja rajonka «Adzinstva» krychu aśviatlaje vajennyja padziei — piša pra śviatočnyja mitynhi da 23 lutaha. «Razmaŭlać z nami z pazicyi siły, movaj šantažu i pahroz my nikomu nie dazvolim», — cytuje hazieta hienierał-majora Alaksandra Navumienku. I publikuje fota, jak jon na refierendumie daterminova prahałasavaŭ «za budučyniu krainy».
Pra daterminovaje hałasavańnie jak hałoŭnuju padzieju piša i «Aršanskaja hazieta». A jašče pra toje, što ŭ horadzie adkryłasia vystava elektramabilaŭ — čym nie navina dla Oršy ŭ dzień, kali pačałasia vajna.
Rajonka «Pinski vieśnik» taksama nie ličyć vajnu hałoŭnaj temaj. Bo chutka refierendum i na došku honaru zanieśli novych asob. «Dzień druhi, aktyŭnaść nie spadaje», — heta cytata pra daterminovaje hałasavańnie, a nie pra ŭvarvańnie Rasii va Ukrainu, jak vy mahli b padumać.
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Ciapier čytajuć
«Heta była žyvaja kamiera sačeńnia». Što rabiła viciablanka Kaciaryna, kab vyzvalicca praz 5 hadoŭ zamiest prysudžanych 12 hadoŭ9
Kamientary