«Duša skakała ad ščaścia». Słavuty trenier frystajlistaŭ Mikałaj Kazieka ab srebry Hanny Huśkovaj

— Hanna realizavała svoj patencyjał. Viadoma, umovy dla spabornictvaŭ byli dosyć ciažkija. Ja razumieju i baču, što mnohaje było zroblena dziakujučy valavym namahańniam Ani, — prakamientavaŭ vystup spartsmienki Mikałaj Kazieka. — Jana była zaradžanaja na baraćbu padčas kožnaha skačka. Było vidać, što jana całkam addavałasia.

— Što rabiłasia ŭ vas na dušy, kali zrazumieli: u Hanny miedal?

— Ja vielmi radavaŭsia. Ania pieryjadyčna mnie telefanavała. My ŭvieś čas byli ŭ kantakcie, [ja] padtrymlivaŭ jaje. Časam paśla trenirovačnych pracesaŭ jana zadavała składanyja pytańni, — raskazvaje trenier i kaža, što apošni raz jany razmaŭlali try dni tamu. Pra što mienavita — nie ahučvaje, ale žartuje: «Parady pajšli na karyść». — Jana zavajavała srebrany miedal tym ža skačkom, što i zołata ŭ karejskim Pchienčchanie.

— Skakali ad ščaścia, kali zrazumieli — miedal?

— Ja nie skakaŭ, — uśmichajecca Mikałaj Kazieka, — ale duša skakała.

— A byŭ nievialiki sum ad taho, što ad pieršaha miesca Hannu adździaliła zusim niašmat?

— Spabornictvy dla Ani składvalisia nie zusim hładka. Ja dumaju, varta zadavolvacca tym, što jość. Jak napisana ŭ Biblii, budź zadavoleny małym. A tut nie mały, heta ŭsio-taki srebrany miedal. Heta plon nialohkaj pracy.

— Upieršyniu za stolki hadoŭ vy — nie na Alimpijadzie, nie pobač sa spartoŭcami. Jak jano?

— Tam — usie maje vučni: i treniery, i spartsmieny. Heta ŭsie tyja, z kim ja pracavaŭ. U kožnym ź ich čaścinka majoj pracy. Ja vielmi zadavoleny tym, što sprava praciahvajecca. Heta pierš za ŭsio. Što toje, što pačynałasia z nula, jano nie zahłuchła z-za adnoj, skažam tak, durnoty. Značyć, jano było mocnym. Značyć, zakładzieny mocny padmurak. I ja zadavoleny, što hety padmurak zakładvaŭ ja.

— Užo źviazvalisia z Hannaj?

— Ź joj ciapier nie źviažašsia. U jaje dopinh-kantrol, ale ja adpraviŭ joj SMS. Napisaŭ: «Ania, vinšuju».

— A z rodnymi Hanny ŭžo paśpieli pahavaryć? Jak jany?

— Razmaŭlaŭ z chrosnaj maci. Jana skazała, płača ad ščaścia. A mama Ani telefon adklučyła.

— A vy sami jak budziecie śviatkavać?

— Zaŭtra pačynajucca mužčynskija spabornictvy, jašče ranavata śviatkavać, — žartuje Mikałaj Ivanavič. — Jašče idzie baraćba, ale, viadoma, hety momant my adznačym.

Nahadajem, paśla vybaraŭ-2020 Mikałaj Kazieka vystupiŭ suprać hvałtu, za što i paciarpieŭ. Ciapier Mikałaja Ivanaviča faktyčna nie dapuskajuć da trenirovak, jon zajmajecca tolki mietadyčnaj pracaj. Spartsmieny pisali ŭ padtrymku treniera kalektyŭny zvarot, ale heta nie źmianiła situacyju. Sa zbornaj pracujuć Dźmitryj Daščynski i Michaił Kurłovič.

Čytajcie taksama:

Cichanoŭskaja pavinšavała Huśkovu ź miedalom i zastupiłasia za spartoŭcaŭ, jakich prymusili zapisvać «pakajannyja» videa

Hanna Huśkova vyjhrała srebra Alimpijady ŭ Piekinie

Niaŭdały biznesmien i trenier zbornaj. Čym zajmajucca ciapier byłyja biełaruskija zorki zimovych Alimpijadaŭ

Honar za frystajł i bijatłon dy hulni pad BČB. Jak raniej Biełaruś vystupała na zimovych Alimpijadach i čaho čakać ciapier?

• 0
• 0
• 0
• 0
• 0
• 0
• 0
• 0