Kaały ŭ Aŭstralii akazalisia na miažy źniknieńnia. Vinavatyja pažary i vysiakańnie lasoŭ

Fiederalny ŭrad Aŭstralii zajaviŭ, što na asablivym stanoviščy kaały buduć u štatach Kvinślend i Novy Paŭdniovy Uels, a taksama na Aŭstralijskaj staličnaj terytoryi (ACT). Jon taksama rekamiendavaŭ pryniać terminovyja miery dla vyratavańnia kaał.

Hetyja žyvioły źjaŭlajucca endemičnymi dla Aŭstralii, to-bok nidzie bolš u śviecie ich u dzikaj pryrodzie niama. U śpis «uraźlivych» vidaŭ jany patrapili tolki ŭ 2012 hodzie.

Niekatoryja abaroncy navakolnaha asiarodździa ličać, što ŭrad pavinien byŭ pačać dziejničać značna raniej. «Toje, što kaały patrapili ŭ hety śpis, aznačaje, što z hetaha času dziejańni, skiravanyja na ich achovu, atrymajuć pryjarytet», — zajaviła ministr navakolnaha asiarodździa Aŭstralii Siuzan Lej.

Ministarka taksama dadała, što raspracoŭvajecca płan mierapryjemstvaŭ, skiravanych na vyratavańnie kaał, a lubyja zajaŭki na asvajeńnie ziemlaŭ z hetaha času buduć razhladacca ŭ śviatle taho, ci akažuć jany niehatyŭny ŭpłyŭ na ich kolkaść.

U minułym hodzie praviedzienaje ŭ Novym Paŭdniovym Uelsie daśledavańnie pakazała, što pry adsutnaści terminovych achoŭnych zachadaŭ kaały ŭ hetym štacie całkam źniknuć da 2050 hoda. 

Pavodle najaŭnych acenak, u lasnych pažarach tak zvanaha «čornaha leta» 2019—2020 hadoŭ u hetym štacie zahinuła bolš za 5000 kaał, a terytoryja ich areała skaracilisia na 24%.

Najbujniejšaja aŭstralijskaja arhanizacyja, jakaja zajmajecca achovaj kaał, śćviardžaje, što ciapier u dzikaj pryrodzie ich zastałosia ŭsiaho tolki kala 50 tysiač. Jašče try hady tamu kazali, što ich było 80 tysiač.

«Usiaho za niekalki dziesiacihodździaŭ kaały pierajšli ad šyroka raspaŭsiudžanaha vidu da ŭraźlivaha, a potym i da takoha, jaki źnikaje. Heta katastrafična chutkaja dehradacyja,

— kaža Ściuart Błanč, ekołah z aŭstralijskaha adździaleńnia Suśvietnaha fondu pryrody (WWF). — My, zrazumieła, vitajem siońniašniaje rašeńnie ŭrada, ale jano nie spynić poŭnaha źniknieńnia kaał, kali nie budzie supravadžacca bolš strohimi zakonami i prahramami, nakiravanymi na toje, kab uładalnikam ziamiel było vyhadna zachoŭvać ich asiarodździe pražyvańnia», — dadaŭ Błanč.

Navukoŭcy taksama papiaredžvajuć, što źmianieńnie klimatu pryviadzie da bolšaj kolkaści lasnych pažaraŭ i adabjecca na adzinym racyjonie kaały — liści eŭkalipta.

Akramia Novaha Paŭdniovaha Uelsa, kaały taksama sustrakajucca ŭ Paŭdniovaj Aŭstralii i Viktoryi, ale, pa danych pryrodaachoŭnych arhanizacyj, ich kolkaść skaračajecca i ŭ cełym pa krainie.

Čytajcie taksama:

Aŭstralijskich kaał nazvali «funkcyjanalna» vymierłymi

• 0
• 0
• 0
• 0
• 0
• 0
• 0
• 0