U hetaj afrykanskaj dziaržavie, što słavicca pieravarotami, pasprabavali ździejśnić čarhovy. Hetym razam niaŭdała 

Učora la budynka ŭrada ŭ Bisau (stalicy krainy), dzie prachodziła pazačarhovaje pasiadžeńnie Kabinieta ministraŭ z udziełam prezidenta, pačałasia stralba. Miascovyja rynki i banki byli zakrytyja, a na vulicy horada vyjechali aŭtamabili z vajskoŭcami. Śviedki paviedamlali, što va ŭradavy kompleks uvajšli ŭzbrojenyja ludzi, adnak niekatoryja apisvali ich jak cyvilnych, a inšyja — jak vajskoŭcaŭ, piša Bi-bi-si.

Paśla hetaha lidary zachodnieafrykanskich krain u sumiesnaj zajavie asudzili sprobu źviaržeńnia prezidenta i zaklikali vajskoŭcaŭ viarnucca ŭ kazarmy. Paviedamlałasia taksama pra zahinułych i pra toje, što sałdaty nibyta zatrymali prezidenta i ministraŭ urada.

Adnak paźniej prezident apublikavaŭ videazvarot u Fejsbuku, dzie zajaviŭ, što pahroza źnikła. «Dziakuj bohu, ja ŭ paradku, — taksama napisaŭ Embało ŭ Tvitary. — Situacyja pad kantrolem». U karotkim telefonnym intervju ahienctvu «Frans Pres» prezident taksama skazaŭ: «Usio ŭ paradku».

Pa słovach Embało, niekatoryja z tych, chto braŭ udzieł u napadzie, byli aryštavanyja. Prezident paviedamiŭ, što padčas supraćstajańnia zahinuli mnohija supracoŭniki siłavych struktur, adnak nie ŭdakładniŭ, kolki mienavita i na čyim baku jany vystupali.

Pa ironii losu na pasiadžeńni Kabinieta ministraŭ, pierapynienym uzbrojenymi ludźmi, abmiarkoŭvałasia padrychtoŭka da samitu ekanamičnaj supolnaści zachodnieafrykanskich dziaržaŭ, na paradku dnia jakoha było pytańnie ab tym, jak reahavać na vajenny pieravarot u Burkina-Faso, adzin z troch, jakija zdarylisia ŭ rehijonie za apošnija paŭtara hoda.

Hvinieja-Bisau znachodzicca ŭ Zachodniaj Afrycy, z dvuch bakoŭ jaje akružajuć Sieniehał i Hvinieja. Heta adna z najbiadniejšych krain śvietu, pa VUP jana na 14‑m miescy z kanca.

Z 1980 hoda kraina pieražyła ŭžo dzieviać pieravarotaŭ i sprobaŭ pieravarotu.

Tolki adzin prezident za ŭsiu historyju krainy z momantu zdabyćcia joju niezaležnaści zmoh pratrymacca va ŭładzie ŭsie naležnyja pa rehłamiencie piać hadoŭ.

U Hviniei-Bisau vielizarny dziaržaŭny doŭh, kraina mocna zaležyć ad zamiežnaj dapamohi. U dadatak ź niekatorych časoŭ kraina stała pieravałačnym punktam dla narkotykaŭ z Łacinskuju Amieryki, tak što ciapier jaje navat nazyvajuć pieršaj afrykanskaj narkadziaržavaj.

Chvalavańni ŭ krainie, jakija, miarkujučy pa ŭsim, i pryviali da ciapierašniaj sproby pieravarotu, pačalisia jašče dva hady tamu, kali viadomy palityk, były kiraŭnik urada krainy Daminhuš Simojnš Pierejra i jaho ŭpłyvovaja Afrykanskaja partyja niezaležnaści Hviniei-Bisau i Kaba-Verde asprečyli vyniki vybaraŭ, adnak prysudzili pieramohu Embało.

Pierejra abvinavaciŭ prezidenta ŭ niezakonnym prysvajeńni ŭłady pry padtrymcy vajskoŭcaŭ.

• 0
• 0
• 0
• 0
• 0
• 0
• 0
• 0