«Pakinuła sud sa słovami «Žyvie Biełaruś». Dla ŭžo asudžanaj Volhi Kłaskoŭskaj prakuror paprasiŭ 2,5 hoda kałonii pa novaj spravie
U sudzie Maskoŭskaha rajona Bresta 19 studzienia adbyŭsia razhlad novaj kryminalnaj spravy suprać palitźniavolenaj Volhi Kłaskoŭskaj, jakuju raspačali, kali žančyna ŭžo adbyvała termin u homielskaj kałonii pa pieršaj spravie.
Hod tamu Volhu asudzili da dvuch hadoŭ kałonii za ŭdzieł u pratestach u kastryčniku 2020 hoda, ciapier jaje sudziać pa art. 369 Kryminalnaha kodeksa (abraza pradstaŭnika ŭłady) za kamientaryj u adras bresckaha milicyjanta, paviedamlaje «Novy čas».
Ciapier Kłaskoŭskaja abvinavačvajecca ŭ abrazie supracoŭnika Leninskaha RAUS Andreja Chviesiuka. Hety kamientaryj byŭ źmieščany jašče da jaje aryštu, ale spravu suprać palitźniavolenaj zaviali tolki ŭ žniŭni 2021 hoda — praź siem miesiacaŭ paśla prysudu pa pieršaj spravie.
Na sudzie Volha admoviłasia ŭstavać paśla abviaščeńnia składu suda i nazvać svajo imia i proźvišča. Jana taksama adrazu zajaviła chadajnictva ab svaim vydaleńni z zały pasiadžeńniaŭ i zajaviła, što «sud nad joj niezakonny i niespraviadlivy i ŭdzielničać ŭ hetym jana nie źbirajecca». Sud zadavoliŭ jaje chadajnictva. Jana pakinuła zału sudovaha pasiadžeńnia pad kanvojem z vokličam «Žyvie Biełaruś». Razam ź joj hetaje pasiadžeńnie pakinuła i jaje maci Ludmiła, jakaja pryjechała ŭ Brest padtrymać svaju dačku.
«Volha vyhladaje badzioraj, upeŭnienaj u svajoj pravacie», — raspaviała Ludmiła Kłaskoŭskaja, jakaja nie bačyła dačku bolš za hod.
Sudździa Maryja Alifieruk abvieścić prysud siońnia, 20 studzienia, u 16 hadzin.
Raniej Volhu ŭžo asudzili da dvuch hadoŭ kałonii pa č. 1 art. 342 KK za pierakryćcio ruchu transpartu ŭ minskaj Sierabrancy. Za ŭvieś čas u niavoli Kłaskoŭskuju nieadnarazova źmiaščali ŭ karcar i ŭ pamiaškańnie kamiernaha typu. Volha ŭžo adbyvała pakarańnie ŭ homielskaj kałonii №4, kali suprać jaje ŭzbudzili novuju kryminalnuju spravu.
U SIZA-7, kudy jaje etapavali z kałonii paśla zaviadzieńnia kryminalnaj spravy, jaje pastavili adrazu na dva prafiłaktyčnyja ŭliki: jak «schilnuju da ekstremisckaj i inšaj destruktyŭnaj dziejnaści» i «schilnuju da zachopu zakładnikaŭ, napadu na administracyju i chulihanskich prajavaŭ».
Ciapier čytajuć
Aryštavany sienatar Karpicki, hałoŭny doktar Bresckaj abłasnoj balnicy13
Kamientary