«Na praktycy takich vypadkaŭ u mianie i kaleh nikoli nie było». Sudmiedekśpierty acanili viersiju SK ab śmierci Uschopava ad ałkahola i marychuany
Užo 6 studzienia SK adcpravazdačyŭsia, što ŭstanoŭlena pryčyna śmierci Dźmitryja Uschopava, jaki pamior u navahodniuju noč paśla zatrymańnia milicyjaj.
«Zhodna z vysnovaj sudova-miedycynskaj ekśpiertyzy, śmierć žychara Rečycy nastupiła ŭ vyniku kambinavanaha atručvańnia etyłavym śpirtam i asabliva niebiaśpiečnym psichatropam — tetrahidrakanabinołam», — śćviardžaje SK.
U realnaści za słovam «tetrahidrakanabinoł» chavajecca zvyčajnaja marychuana, dazvolenaja jak lek u mnostvie krain, ci navat jak zabaŭlalny srodak.
«Naša Niva» spytała dvuch daśviedčanych sudmiedekśpiertaŭ, jak jany aceńvajuć aficyjnuju viersiju.
«Tearetyčna takoje moža być, ale na praktycy takich vypadkaŭ nie było ni ŭ mianie, ni ŭ maich kaleh.
Jak praviła, pierad śmierciu ad vostraha atručvańnia etyłavym śpirtam pavinna mieć miesca hłybokaje pryhniečvańnie śviadomaści, ale na videa pacyjent u prytomnaści.
Chiba što ałkahol moža być jašče ŭ stadyi ŭsmoktvańnia ŭ kroŭ sa straŭnika», — kaža adzin z sudmiedekśpiertaŭ.
«Uzajemnaje ŭzmacnieńnie prynamsi apisvajecca ŭ litaratury, ale — u apisanym vypadku jon [Uschopaŭ] naŭrad ci zmoh by sam pierasoŭvacca, što supiarečyć videa», — ličyć inšy sudmiedekśpiert.
U śpiecyjalistaŭ vyklikaje sumnievy, što možna było zrabić kampietentnyja vysnovy pa dyjahnazie ŭ taki karotki termin. Ekśpiertyzy, naprykład, na ŭtrymańnie narkotykaŭ zvyčajna pravodziacca za dva-try tydni.
«Dla pastanoŭki takoha sudova-miedycynskaha dyjahnazu patrabujecca pravieści maksimalnuju kolkaść daśledavańniaŭ: sudova-chimičnaha, sudova-histałahičnaha, sudova-bijachimičnaha. Sama technałohija daśledavańniaŭ patrabuje vialikich vydatkaŭ pa časie, zvyčajna na heta sychodzić da miesiaca», — kaža adzin z ekśpiertaŭ.
Navat kali patrabavali paskoryć praviadzieńnie ekśpiertyzy ŭ suviazi z šyrokim hramadskim rezanansam, «histałahičnaja vyrazka i pravodka materyjała pa reaktyvach zajmaje bolš času, čym u ich zaniała ŭsia ekśpiertyza». «Heta — fantastyka!» — dadaje ekśpiert.
Pavodle krynicy, luby dyjahnaz «atručvańnie» patrabuje nie tolki vyjaŭleńnia ŭ arhaniźmie taksičnych rečyvaŭ (jadaŭ), ale i marfałahičnaj karciny atručvańnia.
Zvyčajna jana biednaja, časta zaŭvažnaja tolki pad mikraskopam. Pracedura heta pracajomkaja. Dla taho, kab pahladzieć kavałački ŭnutranych orhanaŭ trupa pad mikraskopam, padčas uskryćcia ich adbirajuć u fiksavalnuju vadkaść na asnovie farmaldehidu.
Paśla fiksacyi adbyvajecca vyrazka. Padčas vyrazki ekśpiert-histołah vyznačaje, jakija častki kanfiskavanych kavałačkaŭ jamu padychodziać dla daśledavańnia, i vyrazaje ich. Dalej hetyja nievialikija abranyja kavałački zalivajucca parafinam z farmavańniem parafinavych błokaŭ.
Parafinavyja błoki narazajucca mikratomam. Paśla hetaha zrezy pavinny być afarbavanyja pa śpiecyjalnych mietodykach i paśla afarboŭki vyvučanyja ekśpiertam-histołaham pad mikraskopam.
Tolki praces padrychtoŭki materyjału da prahladu pad mikraskopam zvyčajna zajmaje kala 1 tydnia.
Biez vyjaŭleńnia marfałahičnych prykmiet atručvańnia, na padstavie tolki chimičnaha daśledavańnia nielha vystavić dyjahnaz «atručvańnie».
«Da taho ž, kali ličby etanołu vyznačajucca dakładna, to vytvornyja kanabisu vyznačajucca tolki na najaŭnaść, biez ustanaŭleńnia kancentracyi», — kaža śpiecyjalist.
Takim čynam, na dumku ekśpiertaŭ, sam vypadak takoha śmiarotnaha atručvańnia — małarealistyčny.
Pa-druhoje, vyniki źjavilisia nadta chutka, što stavić pad sumnieŭ usie vysnovy.
Pa-treciaje, u hramadstva zastajecca pytańnie: a čamu ž tady Uschopavu nie była akazanaja svoječasovaja miedycynskaja dapamoha i chto za heta paniasie adkaznaść?
Miž tym stała viadoma pra cisk na rodnych i siabroŭ Uschopava. Niekalki čałaviek byli zatrymanyja, ich vinavaciać u niezakonnym abarocie narkotykaŭ. Niekatoryja rodnyja i blizkija Źmitra źjechali z krainy.
Źjaviłasia videa, jak Uschopaŭ sam zachodzić u RAUS. Praź dźvie hadziny jon budzie miortvy
«Maci vyjšła z padjezda sa zdymkam Dzimy ŭ rukach i skazała, što joj užo ničoha nie strašna». Blizkija raźvitalisia sa Źmitrom Uschopavym
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi1111
Kamientary