Syšoŭ u adstaŭku sudździa, jaki admoviŭsia sudzić palitviaźnia pa spuščanym źvierchu artykule. Padrabiaznaści
Na pravo.by źjaviŭsia ŭkaz ab vyzvaleńni i pryznačeńni sudździaŭ. Adzin ź niešmatlikich admietnych momantaŭ u im — vyzvaleńnie ad pasady sudździ Minskaha haradskoha suda Dźmitryja Cykała. Pa ŭłasnym žadańni. U hetaj historyi jość admietnaść.
Karjera sudździ pajšła ŭniz paśla taho, jak adbyłasia dziŭnaja zamiena Dźmitryja Cykała na Piatra Arłova ŭ razhladzie spravy palitviaźnia Cichana Osipava.
Osipavu prysudzili 11 hod kałonii ŭzmocnienaha režymu za ŭdzieł u «masavych biesparadkach», «zamachu na zabojstva supracoŭnika orhanaŭ unutranych spraŭ» i «zaviedama iłžyvy danos».
U noč z 10 na 11 žniŭnia Osipaŭ najechaŭ na svajoj mašynie na siłavikoŭ, jakija razhaniali demanstrantaŭ. A potym utapiŭ mašynu ŭ vadzie i zajaviŭ, što jaje skrali. Zamiena sudździ pa chodu spravy — ekstraardynarnaja źjava dla biełaruskich sudoŭ.
Jak viadoma «Našaj Nivie», hety kiejs maje pieradhistoryju: Cykał upiorsia z kvalifikacyjaj, zajaviŭšy, što nie bačyć u spravie zamachu na zabojstva, a tamu, maŭlaŭ, budzie razhladać spravu jak art. 364 KK «Hvałt abo pahroza hvałtu ŭ dačynieńni da supracoŭnika orhanaŭ unutranych spraŭ».
Paśla hetaha jaho zamianili.
Dalej Cykał trapiŭ u źliŭ orhanaŭ prapahandy HUBAZiKa: u aryštavanaha eks-prakurora Jaŭhiena Babaka na telefonie znajšli pierapisku z Cykałam, jakuju toj nie vydaliŭ.
Ci majuć hetyja padziei suviaź z adstaŭkaj Cykała, nieviadoma, ale sam jon napisaŭ zajavu na zvalnieńnie ŭ žniŭni 2021-ha i čakaŭ paŭhoda da adstaŭki.
Pavodle bazy manitorynhu niezakonnych sudovych rašeńniaŭ, u Cykała było dva razhlady apielacyj pa 23.34 u 2020 hodzie — jon paćvierdziŭ rašeńni ab 20 i 25 bazavych vieličyniach štrafu, vyniesienych biełarusam rajonnymi sudździami.
Da 2020 jon prysudžaŭ štrafy za palityčnuju aktyŭnaść Źmitru Daškieviču, Paŭłu Vinahradavu, Leanidu Kułakovu. A taksama davaŭ sutki ŭdzielnikam Dnia Voli — 2017.
Baćka Cykała — były namieśnik dyrektara Muzieja Ajčynnaj vajny ŭ Minsku.
«Naša Niva» patelefanavała Dźmitryju Cykału. Ën admoviŭsia ad kamientaroŭ.
Kamientary