Makiej: Biełaruś ryzykuje stracić dziaržaŭnaść, kali sankcyjny cisk budzie praciahvacca
Ministr zamiežnych spraŭ Uładzimir Makiej u intervju «Biełaruś 1» pa vynikach pajezdki ŭ Stakholm na pasiadžeńnie Savieta ministraŭ zamiežnych spraŭ ABSIE zajaviŭ, što praz sankcyi nichto nie dasiahnie svaich metaŭ.
«Biełaruś ryzykuje stracić dziaržaŭnaść, kali sankcyjny cisk budzie praciahvacca. Choć my zrobim usio, kab takoha nie zdaryłasia, a Jeŭrasajuz nazaŭždy stracić Biełaruś. I ja dumaju, što heta absalutna nie ŭ intaresach Jeŭropy. Peŭnaje razumieńnie jość, ale, na žal, u siłu zvykłych pavodzinaŭ tut heta mierkavańnie abmiarkoŭvajecca kułuarna praz bojaź być raskrytykavanym z boku tak zvanaj hramadskaj dumki svaich krain abo tak zvanych svabodnych srodkaŭ masavaj infarmacyi svaich krain», — skazaŭ Makiej.
U arhumientacyi jon spasłaŭsia na pazicyju Zianona Paźniaka, jaki taksama vystupaje suprać sankcyj.
«Navat, u maim razumieńni, sapraŭdny apazicyjanier, zahartavany apazicyjanier, taki jak Zianon Paźniak, užo šmat razoŭ vykazvaŭsia na hetuju temu i kazaŭ pra toje, što tyja ludzi, jakija ciapier zaklikajuć da sankcyj suprać svajho naroda, nie tolki pa-durnomu pavodziać siabie, jany idyjoty. I jon robić vysnovu, što Biełaruś moža ŭ vyniku sapraŭdy stracić suvierenitet, niezaležnaść i dziaržaŭnaść. Ja absalutna zhodny ź mierkavańniem Zianona Paźniaka i liču, što šmat u čym vinavatyja tyja ludzi, jakija siońnia zaklikajuć da sankcyj», — zajaviŭ Uładzimir Makiej.
Jon taksama rezka vykazaŭsia ab prysutnaści Śviatłany Cichanoŭskaj na pasiadžeńni Savieta ministraŭ zamiežnych spraŭ ABSIE ŭ Stakholmie, nie zhadaŭšy jaje imia.
«Staršynia Parłamienckaj asamblei ABSIE — pradstaŭnik Šviecyi — zaprasiła viadomuju madam na šerah mierapryjemstvaŭ pa-za pasiadžeńniem ministraŭ zamiežnych spraŭ ABSIE. Naturalna ŭ metach papularyzacyi viadomych asob. Šerah maich kaleh mnie raspaviali pra toje, što viadomaja madam damahałasia sustrečy ź imi, telefanavała nastojliva pa telefonach. Chtości pahadziŭsia, chtości admoviŭsia — ja viedaju, chto admoviŭsia. Meta zrazumiełaja: praz takoha kštałtu fotapijar pakazać svaju značnaść», — vykazaŭsia Makiej.
Jon taksama raspavioŭ pra niejkija tajemnyja sustrečy ŭ Stakholmie, pra jakija nibyta prasili nie paviedamlać.
Sustreču Ryžankova ź Sikorskim paprasiŭ Minsk. Što kamanda Cichanoŭskaj abmiarkoŭvała z palakami da i paśla jaje11
Kamientary