Ihumieńnia Haŭryiła pierachryściła dziaciej kurdskich mihrantaŭ — tak možna było? Spytali ŭ muftyja, što kaža isłam
Niekalki tysiač irakskich kurdaŭ praciahvajuć sproby trapić u ES. Paśla kidańnia kamianioŭ u palakaŭ na pamiežnym pierachodzie Bruzhi, častka mihrantaŭ pajechała adpačyvać u pamiaškańnie łahistyčnaha centra, jakoje im pradastavili biełaruskija ŭłady. Tudy pryjechała ihumieńnia Haŭryiła, nastajacielnica hrodzienskaha Śviata-Rastva-Baharodzickaha žanočaha manastyra. Ź vialikim pravasłaŭnym kryžam u rukach jana razdavała dzieciam šakaładki, paśla čaho pierachryščvała małych. Siarod kurdaŭ šmat musulman — ci dazvolenyja takija pavodziny ŭ dačynieńni da ich dziaciej?
Muftyj Ali Varanovič tłumačyć:
«Tut adkaznaść na siabie biaruć baćki dziaciej, jakija byli pobač. Ale ja nie bačyŭ hetaj situacyi, tamu ciažka skazać dakładniej.
Tamu adznaču taki momant — u isłamie ŭsie dzieci, jakija nie dasiahnuli paŭnaletniaha ŭzrostu, ličacca musulmanami. Paŭnalećcie tut majecca na ŭvazie nie 18-hodździe, a pałavoje saśpiavańnie, to-bok, niedzie 11-13 hadoŭ. Paśla ŭžo ŭ ich jość vybar vieravyznańnia.
I pa isłamu, jakija b abrady nad dziećmi ni pravodziacca, chryści ci ni chryści, heta ni na što nie ŭpłyvaje, dzieci praciahvajuć zastavacca musulmanami. Tamu i paśla nijakich admysłovych abradaŭ pravodzić nie treba».
Taksama šmat ździŭlenych kamientaraŭ vyklikała razdača ježy, kali biełaruskija ŭłady pryvozili mihrantam kaŭbasu i sasiski. U asnoŭnym, čytačy cikavilisia: a ci dakładna toje chalal, dazvolenaja musulmanam ježa, nie śvinina?
Ale ž, akazvajecca, u takoj situacyi isłam dazvalaje jeści lubuju ježu.
«U ekstremalnych umovach možna jeści navat i śvininu, asabliva kali jość pahroza žyćciu ci zdaroŭju musulmanina, — kaža Varanovič. — Tut niama prablemy. Kab zachavać žyćcio musulmanin navat abaviazany jeści toje, što jość, u tym liku i zabaronienaje.
U svoj čas, kali ja słužyŭ u vojsku, da nas trapiŭ uźbiek. Tydzień jon nie jeŭ stravy ź miascovaj stałoŭki, a paśla pačaŭ jeści. Ź jaho paśmichalisia, ale jon usio pravilna zrabiŭ — kab zachavać zdaroŭje, pry adsutnaści vybaru, musulmanin pavinien zrabić usio mahčymaje».
Čytajcie taksama:
Da mihrantaŭ u Bruzhi pryjechała ihumieńnia Haŭryiła VIDEA
Ciapier čytajuć
«Mis Biełaruś» usio bolš nahadvaje konkurs pryhažości ŭ haremie20
Kamientary