Dyk usio ž jak i dzie zatrymali žurnalista «Kamsamolskaj praŭdy»? Sprabujem raskrucić błytany kłubok z raznastajnych zajaŭ

Pieršaja bolš-mienš padrabiaznaja infarmacyja pra toje, kudy źnik Hienadź Mažejka, źjaviłasia 2-ha kastryčnika ad jaho maci.

Jana paviedamiła, što apošni raz razmaŭlała z synam pa videasuviazi 30 vieraśnia: syn tady znachodziŭsia ŭ hateli ŭ Maskvie.

Fakt znachodžańnia ŭ Rasii paćviardziŭsia i ź inšych krynic. Maci padkreśliła, što padčas pieratrusu Hienadzia nie było doma.  Spravaj zaniałosia KDB.

Pavialičyć

Toje, što žurnalista zatrymali ŭ Maskvie, ahučvała nie tolki jaho maci, ale i redaktar «KP» Uładzimir Sunhorkin, i vałanciory.

Zatrymańnie žurnalista z terytoryi Rasii nazyvajuć «vykradańniem». Jaho hučniej za ŭsiaho asudžajuć mienavita rasijskija palityki i miedyjapiersony: ad deputata Dziarždumy da staršyni Sajuza žurnalistaŭ Rasii Uładzimira Sałaŭjova z błohieram Illom Varłamavym i redaktarkaj telekanała RT Marharytaj Simańjan.

Pytańnie z «KP» dajšło da pres-sakratara Pucina i samoha prezidenta Rasii. Praŭda, u Kramli adznačyli, što «detalaŭ jany nie viedajuć». 

Darečy, advakataŭ da Mažejki ŭ pieršyja dni nie puścili, jak jany nie sprabavali da jaho patrapić. 

Miž tym, MUS Biełarusiŭ hety čas ničoha nie kamientuje. Za hety čas Biełaruski sajuz žurnalistaŭ zajaviŭ, što ŭ ich infarmacyja jość, ale jany nie buduć jaje publikavać, bo «infarmacyja moža pahoršyć stanovišča žurnalista».

U paniadziełak, 4 kastryčnika ministerstva ahučyła svaju pazicyju. Pa słovach biełaruskaha boku Mažejku «ŭziali» ŭ nacyjanalnym aeraporcie «Minsk». 

Dalej biełaruskaje ministerstva ŭnutranych spraŭ rastłumačyła, čamu Mažejka ŭsio ž z Rasii viarnuŭsia nazad u Minsk. Siłaviki śćviardžajuć, što žurnalist z Maskvy chacieŭ vylecieć u treciuju krainu. Ale pry sprobie zrabić heta daviedaŭsia, što byŭ pryznany niepažadanym na terytoryi hetaj samaj Rasii. Tamu nikudy vylecieć Hienadź i nie zmoh — i voś jon viartajecca na radzimu.

Dadatkova MUS zajaŭlaje, što ŭ bazu «nieŭjaznych» (i, vychodzić, niavyjaznych z terytoryi Rasii ŭ treciuju krainu), «niepažadanych» hramadzian Mažejku ŭniesła sama Rasija.

Zdaryłasia heta, uvaha, «raniej za kastryčnik 2021 hoda». Ale vyśviatlajecca, što heta nie tak. Zhodna z dadzienymi Hałoŭnaha ŭpraŭleńnia pa pytańniach mihracyi MUS Rasii, Hienadź Mažejka adsutničaje ŭ śpisie niepažadanych asob. 

Toje, čamu biełaruski žurnalist byŭ vymušany pakinuć Rasiju, pry jakich abstavinach? Tak i zastajecca hałoŭnym pytańniem biez adkazu.

Nahadajem, žurnalist «Kamsamolskaj praŭdy» Hienadź Mažejka napisaŭ artykuł pra Andreja Zielcera — zanatavaŭ uspaminy jaho byłoj adnakłaśnicy. U vyniku jon staŭ adnym z padazravanych pa dvum artykułam KK: č. 3 art. 130 (raspalvańnie rasavaj, nacyjanalnaj abo relihijnaj varožaści abo roźni) i art. 369 (abraza pradstaŭnika ŭłady). Sajt biełaruskaj «Kamsamołki» byŭ zabłakiravany.

• 0
• 0
• 0
• 0
• 0
• 0
• 0
• 0