Majomaść Čyža znoŭ nie vynieśli: pieršy raz vykanaŭcaŭ napałochali sabaki, druhi raz — rabotniki «Trajpła»
«Naša Niva» praciahvaje nazirać za epapiejaj z aryštavanaj majomaściu Čyža, jakuju majuć vynieści ź jahonaha doma ŭ Łahožasku: za košt jaje Čyž maje spłacić jašče 225 tysiač byłomu mieniedžaru Trajpła Mikałaju Čukisavu, jakomu prava spahnańnia, u svaju čarhu, pieradaŭ Uładzimir Japryncaŭ.
U pieršy prychod sudovych vykanaŭcaŭ, 22 lipienia, trapić unutr doma im nie ŭdałosia, bo znutry pa dvary biehali vialikija sabaki, jakija brachali i spałochali supracoŭnikaŭ.
Učora, 30 lipienia, vykanaŭcy zrabili druhuju sprobu trapić za płot. Sabak tam užo nie było: pa pastanovie orhanaŭ prymusovaha vykanańnia śpiecyjalisty zahnali ich u valjery. Ale ŭ vyniku sudovyja vykanaŭcy za dźviery doma ŭsio adno nie trapili, udałosia ahledzieć tolki ŭčastak. Pa słovach prysutnych, u hety momant źjavilisia nieviadomyja, jakija stali zaminać trapić u dom, pry hetym advakat Čyža abhruntavała admovu adkryć dźviery «nienaležnym paviedamleńniem pra vizit».
«Sudovy vykanaŭca skłaŭ akt zhodna sa skarhaj pradstaŭnika daŭžnika, dziejańni byli spynieny zhodna sa skarhaj, i praciahnucca ŭ najbližejšy čas, paśla novaha paviedamleńnia», — skazaŭ «Našaj Nivie» Michaił Makaraŭ, advakat Mikałaja Čukisava. Pa jaho słovach, žyćciu jahonaha klijenta pahražali nieviadomyja abaroncy doma Juryja Čyža, jakija byli raspaznanyja im jak supracoŭniki «Trajpła», u suviazi z čym Čukisaŭ budzie źviartacca z zajavaj u orhany.
Dahetul nieviadoma, ci znachodzicca ciapier u domie Juryja Čyža raniej apisanaja majomaść, jakaja pavinna być vyniesiena.
Juryj Čyž — niekali samy ŭpłyvovy i nabližany da Łukašenki biznesoviec Biełarusi, čyj biznes ciapier faktyčna pierastaŭ isnavać. «Trajpł» pryznany bankrutam, sam Čyž — fihurant kryminalnaj spravy, a pa kampiensacyju daŭhoŭ staić čarha.
Kamientary