17 lipienia rodnyja zatrymanych našaniŭcaŭ źviarnulisia na pramuju liniju Ministerstva ŭnutranych spravaŭ pa fakcie parušeńniaŭ, jakija adbyvajucca ŭ izalatary časovaha ŭtrymańnia na Akreścina. Našym kaleham nie addajuć pieradačy, jakija pryniali ŭ rodnych, nie vydajuć im paścielnuju bializnu i minimalnyja srodki hihijeny, što źjaŭlajecca hrubym parušeńniem zakona i ŭnutranych praviłaŭ IČU. MUS zarehistravała zajavy i pa zakonie pavinna pradastavić piśmovy adkaz.
Bolš za tydzień našaniŭcy znachodziacca za kratami, u izalatary časovaha ŭtrymańnia na Akreścina. 15 lipienia svajaki zatrymanych pieradali im pieradačy, supracoŭniki IČU ich pryniali, ale da našych kaleh rečy i pradukty tak i nie dajšli.
Takim čynam, dziaviaty dzień ludzi znachodziacca ŭ tym samym adzieńni, u jakim ich zatrymali, niahledziačy na nievynosnuju śpioku, jakaja staić hetymi dniami. U ich niama ni źmiennaj bializny, ni elemientarnych srodkaŭ hihijeny, ni dadatkovaj ježy i pitva. Kudy padzielisia pieradačy, jakija svajaki kuplali za svaje hrošy i pieradvali, nieviadoma. Humanitarnyja nabory, jakija na Akreścina pieradaje «Čyrvony kryž», zatrymanym taksama nie dajuć. Ludzi ŭ izalatary śpiać na padłozie abo na škonkach bieź bializny i matrasaŭ. Usio heta źjaŭlajecca hrubym parušeńniem zakonu i ŭnutranych praviłaŭ IČU.
Nahadajem, 8 lipienia byli zatrymanyja hałoŭny redaktar «Našaj Nivy» Jahor Marcinovič (pry zatrymańni źbity, u SK pryjazdžała chutkaja dapamoha, pakolki była traŭma hałavy), hałoŭny redaktar «Našaj historyi» Andrej Dyńko, kiraŭnik adździeła rekłamy i markietynhu Andrej Skurko, hałoŭny buchhałtar Volha Rakovič (jaje 16 lipienia vyzvalili). U Andreja Skurko — cukrovy dyjabiet. Jak paviedamlali ŭ SK, usie jany prachodziać padazravanymi pa č.1 art. 342 KK (padrychtoŭka ci arhanizacyja dziejańniaŭ, što hruba parušyli hramadski paradak, abo ŭdzieł u ich). Miera ŭtrymańnia nie abirałasia, abvinavačvańnie nie pradjaŭlałasia.
Jak stała viadoma, apošnimi dniami siłaviki apytvajuć hierojaŭ publikacyj NN, schilajuć ich da pryznańniaŭ, što vydańnie płaciła im hrošy za intervju, za toje, kab jany prajaŭlali svaju hramadzianskuju pazicyju. Zajaŭlajem: «Naša Niva» nie źjaŭlajecca palityčnym hulcom, naša zadača — praŭdziva aśviatlać padziei ŭ krainie i śviecie, my nikoli nie płacili hierojam publikacyj, nie schilali ich da prajaŭleńnia palityčnaj pazicyi. Nahadajem, Zakon «Ab masavych mierapryjemstvach» dazvalaje žurnalistam ŚMI pracavać na masavych mierapryjemstvach, niezaležna da taho, sankcyjanavanyja jany ci nie. Našaniŭcy pryznanyja palitviaźniami.
Ciapier čytajuć
«Kazaŭ, što źniščyć mianie, bo ŭ jaho suviazi i pahony». Byłaja žonka vajuje z padpałkoŭnikam. Taho panizili da ŭčastkovaha14
Kamientary