«Z vakna pałaty bačyŭ svoj dom na Płoščy Pieramien». Ściapan Łatypaŭ viarnuŭsia na Vaładarku

Ściapan Łatypaŭ na łavie padsudnych.

Padrychtoŭka vynikaŭ ekspertyzy moža zaniać da troch tydniaŭ. Pra heta paviedamiła ciocia Ściapana Halina Łatypava.

Ekspertyza doŭžyłasia roŭna tydzień

Na sudova-medyčnuju ekspertyzu źniavolenych etapujuć pa sieradach. Ściapan trapiŭ u RNPC psychičnaha zdaroŭja 18 červienia. Ekspertyza hetym razam doŭžyłasia roŭna tydzień. I ŭ nastupnuju sieradu, 25-ha, Ściapana viarnuli na «Vaładarku».

«Pakolki ŭ listapadzie 2020 hodu Ściapan užo prachodziŭ razhornutuju ekspertyzu ŭ RNPC, jakaja doŭžyłasia try tydni, hetym razam chapiła adnaho tydnia. Apošniaja ekspertyza tyčyłasia tolki ŭčynku, jaki Ściapan ździejśniŭ na pieršym sudovym pasiedžańni 1 červienia. Da taho ž takija chutkija terminy praviadzieńnia ekspertyzy admysłoŭcy patłumačyli svajoj vialikaj zahružanaściu. Ściapana ŭžo viarnuli ŭ SIZA.

Kali budzie nastupnaje pasiedžańnie sudu, pakul nieviadoma, bo kamisija rychtuje spravazdaču pa vynikach ekspertyzy, i na heta patrabujecca prykładna 3 tydni», — skazała Halina Łatypava.

Z vakna pałaty Ściapan bačyŭ svoj dom na «Płoščy Pieramien»

U RNPC psychičnaha zdaroŭja Ściapan paprasiŭsia ŭ asobnuju pałatu, jon byŭ tam adzin, praciahvaje ciocia.

«Chaču adpačyć ad ludziej», — patłumačyŭ svaju prośbu Ściapan. Umovy ŭtrymańnia ŭ Navinkach byli dobryja. Pieradačy dla Ściapana prymali biez abmiežavańniaŭ, možna było pieradać navat śviežyja jahady, my pieradavali kłubnicy, a taksama knihi. Ściapan napisaŭ, što z vakna pałaty RNPC u Navinkach jon zdalok navat bačyŭ svoj dom».

Paśla praviadzieńnia sudova-medyčnaj ekspertyzy Łatypava znoŭ źmiaścili na «Vaładarku» ŭ 20-ju kameru, dzie jon apynuŭsia paśla lačeńnia ŭ medsančastcy SIZA i adkul jaho nakiroŭvali na ekspertyzu.

«Ciapier u jahonaj kamery davoli adekvatnyja ludzi, paviedamiła nam advakatka. Ci dachodziać usie listy, ja nia viedaju. Kali pačałasia śpiakota, u kameru pieradali ventylatar. Jamu dasłali i knihi, jakija jon zamoviŭ. 30 červienia advakatka naviedaje Ściapana znoŭ», — kaža Halina Łatypava.

Sud Savieckaha rajonu 10 červienia pastanaviŭ nakiravać Ściapana Łatypava na sudova-medyčnuju ekspertyzu. Zrabić tak prapanavaŭ dziaržabvinavaŭca Ŭładzimier Rabaŭ.

Pryčyna — toje, što padčas pieršaha sudovaha pasiedžańnia 1 červienia Ściapan Łatypaŭ ździejśniŭ sprobu suicydu ŭ kletcy.

Paśla vystupu śviedki-AMAPaŭca Ściapan pakazaŭ hiematomu pad vokam, da taho ž u jaho byli zabintavanyja ruki. Potym jon źviarnuŭsia da baćki: «Tata! Paśla spatkańnia z taboj da mianie pryjšoŭ HUBAZiK. Paabiacaŭ, što kali ja nie pryznaju viny, u mianie budzie «pres-chata», kryminalnyja spravy suprać rodnych i susiedziaŭ. «Pres-chata» ŭ mianie była — 51 dzień. Tak što ty rychtujsia». I ŭvatknuŭ u horła asadku. Paranienaha palitviaźnia źmiaścili spačatku ŭ 9-y špital, a potym u medsančastku SIZA.

Ściapanu Łatypavu 41 hod. Rodam jon ź Bieraściejskaj vobłaści, vučyŭsia ŭ biełaruskaj škole. Pa prafesii Ściapan arbaryst, a taksama pramysłovy alpinist 5 razradu.

Prajšoŭ prafesijnuju padrychtoŭku i sertyfikacyju ŭ Vialikaj Brytanii, maje sertyfikat IRATA (dla tych, chto vykonvaje raboty na vyšyni). Ściapan Łatypaŭ maje svajo IP, jon dyrektar «Biełarba». Pryvodziŭ u paradak, «lačyŭ» drevy ŭ rezydencyi prezydenta, u VIP-klijentaŭ, supracoŭničaŭ z «Dypservisam».

Łatypaŭ pachodzić ź siamji viadomych navukoŭcaŭ-bijolahaŭ. Jaho dzied Anvar Łatypaŭ — doktar bijalahičnych navuk, hienetyk-selekcyjaner, bolš za 30 hadoŭ uznačalvaŭ katedru hienetyki Biełaruskaj sielskahaspadarčaj akademii. Babula Razalija — kandydat navuk, pracavała dacentam BSHA. Baćka Siarhiej i ciocia Halina — taksama kandydaty bijalahičnych navuk.

15 vieraśnia Ściapana Łatypava zatrymali na «Płoščy Pieramien». Jon pryznany palitviaźniem.

• 0
• 0
• 0
• 0
• 0
• 0
• 0
• 0