Siońnia pačynajecca praces pa spravie Viktara Babaryki

U sieradu, 17 lutaha, pačynajecca sud pa «spravie Biełhazprambanka» Viktara Babaryki, jaki moh stać hałoŭnym supiernikam Alaksandra Łukašenki na prezidenckich vybarach u žniŭni minułaha hoda. Spravu razhladaje Viarchoŭny sud u budynku suda Maskoŭskaha rajona.

Papiaredniaje sudovaje pasiadžeńnie prajšło 4 lutaha va ŭmovach vyklučnych mier biaśpieki, adznačaje Tut.by: budynak suda byŭ abstaŭleny mietaličnymi aharodžami, pa pierymietry dziažuryli siłaviki ŭ bałakłavach, usie inšyja pasiadžeńni byli admienienyja.

Jak i na papiaredniaje pasiadžeńnie, na asnoŭnaje pres-słužba Viarchoŭnaha suda admoviłasia akredytavać žurnalistaŭ niezaležnych miedyja. Aficyjnaja pryčyna — prafiłaktyka karanavirusa, deficyt miescaŭ, dopusk dastatkovaj kolkaści ŚMI dla taho, kab zajavić ab zabieśpiačeńni hałosnaści.

Pa «spravie Biełhazprambanka» prachodziać vosiem fihurantaŭ. Viktar Babaryka abvinavačvajecca ŭ «admyvańni» srodkaŭ, atrymanych złačynnym šlacham, i atrymańni chabaru ŭ asabliva bujnym pamiery. Alaksiej Zadojka (były pieršy namieśnik staršyni praŭleńnia Biełhazprambanka), Kirył Badziej (v.a. staršyni praŭleńnia Biełhazprambanka paśla sychodu Babaryki), Siarhiej Šaban (namieśnik staršyni praŭleńnia Biełhazprambanka), Dźmitryj Kuźmič (namieśnik staršyni praŭleńnia banka), Alaksandr Iljasiuk (namieśnik staršyni praŭleńnia banka), Siarhiej Dabralot (były namieśnik staršyni praŭleńnia banka) abvinavačvajucca ŭ atrymańni chabaru ŭ asabliva bujnym pamiery. Viktar Kabiak (zasnavalnik kampanii «Aktyŭlizinh») abvinavačvajecca ŭ dačy chabaru paŭtorna albo ŭ bujnym pamiery.

Z Badziejem, Dabralotam, Kuźmičom, Iljasiukom, Šabanom, Kabiakom padpisanyja dasudovyja pahadnieńni ab supracoŭnictvie, Viktar Babaryka ŭ ich lik nie ŭvachodzić, tamu na papiarednim sudovym pasiadžeńni jaho nie było. Abvinavačanyja, jakija padpisali pahadnieńnie, zajavili ŭ sudzie, što pajšli na heta dobraachvotna i vykanali ŭsie ŭmovy.

Abaronu abvinavačanych ažyćciaŭlajuć bolš za dziesiać advakataŭ, siarod ich Hanna Kieler, Maksim Ahiejeŭ, Alaksandr Paŭłaviec, Siarhiej Bujakievič. Viktara Babaryka abaraniajuć Dźmitryj Łajeŭski i Natalla Mackievič.

Praces viadzie sudździa Ihar Lubavicki, jon pierajšoŭ u Viarchoŭny sud u kastryčniku 2020 hoda, raniej pracavaŭ u Minskim haradskim sudzie, viadomy pavodle «spravy Rehnuma», «spravy miedykaŭ», taksama sudziŭ błohiera Eduarda Palčysa. Dziaržabvinavaŭca — Siarhiej Hierhiel, jon viadomy pa «spravie miedykaŭ», dzie fihuravaŭ akademik Alaksandr Bialecki.

Pavodle viersii śledstva, Viktar Babaryka, kali byŭ staršynioj praŭleńnia Biełhazprambanka, stvaryŭ ź liku svaich namieśnikaŭ arhanizavanuju hrupu z metaj sistematyčna atrymlivać chabar. Za 16 hadoŭ nabiehła suma, bolšaja za 30 młn rubloŭ, u abvinavačvańni fihurujuć nastupnyja kampanii: TAA «Markanstroj«, TAA «Pryvatlizinh», TAA «Sistemy apracoŭki infarmacyi», TAA «Pravavy dyjałoh», TAA «Aktyŭlizinh». Taksama adznačajecca, što Viktar Babaryka za sumu zvyš 1 młn rubloŭ kupiŭ nieruchomaść u Minsku, kab lehalizavać prybytak. Viadoma, što Viktar Babaryka vinu nie pryznaŭ.

Čytajcie taksama: «Vas paličać pamierłymi, ale voś, vy žyvyja». Babaryka źviarnuŭsia da biełarusaŭ napiaredadni suda

• 0
• 0
• 0
• 0
• 0
• 0
• 0
• 0