Spynić tupuju siłu biezzakońnia! Adkryty list vieteranaŭ biełaruskaj žurnalistyki i kiraŭnikoŭ niezaležnych ŚMI

My, vieterany biełaruskaj žurnalistyki i kiraŭniki niezaležnych ŚMI Respubliki Biełaruś, źviartajemsia

da vas — hramadzianie Respubliki Biełaruś;

da vas — Administracyja prezidenta i Urad Respubliki Biełaruś;

da vas — pradstaŭniki ŭładnych i siłavych struktur;

da vas — kalehi ź dziaržaŭnych ŚMI, u kim nie maŭčać prafiesijnaja salidarnaść i sumleńnie;

da vas — pradstaŭniki mižnarodnych žurnalisckich i pravaabarončych arhanizacyj…

My źviartajemsia da vas z adzinym zaklikam —

VYRATAVAĆ NARODŽANUJU Ŭ PAKUTACH DVUCH STAHODŹDZIAŬ NIEZALEŽNUJU BIEŁARUSKUJU ŽURNALISTYKU!

Pačaŭšy ź biesprecedentnaha ŭcisku na niezaležnyja ŚMI, sprabujučy pastavić zasłonu na ich šlachu da čytača, hledača, słuchača, ułada nie abmiežavałasia błakadaj internet-vydańniaŭ, ničym nie matyvavanaj, z parušeńniem usich padpisanych damoŭ admovaj drukavać i raspaŭsiudžvać haziety, pazbaŭleńniem akredytacyi žurnalistaŭ zamiežnych ŚMI…

Toje, što siońnia robicca z boku dziaržavy i jaje siłavych struktur u adnosinach da niezaležnaj biełaruskaj žurnalistyki i žurnalistaŭ, ciažka nazvać uciskam, sprobaj abmiežavać ich upłyŭ na hramadstva. Heta — samaje sapraŭdnaje zadušeńnie Svabody Słova.

Jakim zakonam možna apraŭdać toje, što niezaležnaja hazieta «Narodnaja Vola», jakaja ciaham apošnich šaści hadoŭ nie mieła nivodnaha papiaredžańnia jak ad Ministerstva infarmacyi, tak i ad inšych dziaržaŭnych orhanaŭ kantrolu, bolš za piać miesiacaŭ tamu pa nadumanaj pryčynie była pazbaŭlena mahčymaści drukavacca, raspaŭsiudžvacca pa padpiscy i praz roźničnuju sietku ŭ Respublicy Biełaruś?! U hetkim ža dyskryminacyjnym stanoviščy apynulisia haziety «Svobodnyje novosti», «BiełHazieta» i šerah inšych niezaležnych vydańniaŭ.

Jakim zakonam možna apraŭdać kryminalny pieraśled žurnalistaŭ za sumlennaje vykanańnie svajho prafiesijnaha abaviazku, jak heta adbyvajecca z Kaciarynaj Andrejevaj, Darjaj Čulcovaj, Kaciarynaj Barysievič?

Jakim zakonam možna apraŭdać kryminalny pieraśled žurnalistaŭ za toje, što jany stvaryli sapraŭdnuju škołu prafiesijnaha majsterstva, jak heta adbyvajecca z supracoŭnikami «Pres-kłuba» na čale z Julijaj Słuckaj?

Jakim zakonam možna apraŭdać sotni zatrymańniaŭ žurnalistaŭ padčas vykanańnia imi prafiesijnych abaviazkaŭ, hvałt i administracyjnaje samavolstva ŭłady ŭ dačynieńni da ich?!*

Tak i chočacca ŭskliknuć: ŠTO VY VYTVARAJECIE, PRADSTAŬNIKI ŬŁADY?!

Svaboda słova — nie moŭnaja fihura. Zabivajučy harantavanuju Kanstytucyjaj svabodu słova, volnuju ad prapahandysckich vydumak žurnalistyku, vy zabivajecie dziaržavu, ad imia jakoj tvorycie zło.

Niaŭžo vy sapraŭdy dumajecie, što tupaja siła biezzakońnia zdolnaja pieramahčy siłu praŭdy?

SPYNICIESIA!

VIARNICIE SVABODNUJU ŽURNALISTYKU KRAINIE!

VIARNICIE ŽURNALISTAŬ, JAKIJA ZNACHODZIACCA ZA KRATAMI, ICH SIEM'JAM, ICH VYDAŃNIAM!

VIARNICIE KRAINU VA ŬŁOŃNIE ZAKONAŬ I PRAŬDY!

*Zaŭvaha. U 2020-m i ŭ studzieni 2021 hoda zatrymany 485 žurnalistaŭ, 98 ź ich apynulisia pad aryštam. Usiaho za hety čas žurnalisty praviali za kratami bolš za 1400 dzion. Paśla vybaraŭ 9 žniŭnia zafiksavana 62 vypadki fizičnaha hvałtu ŭ dačynieńni da žurnalistaŭ.

Vieterany biełaruskaj žurnalistyki:

Taćciana Arłova,

Siamion Bukčyn,

Siarhiej Vahanaŭ,

Viačasłaŭ Volski,

Anatol Viarcinski,

Fiodar Vielikasielec,

Valeryj Duboŭski,

Siarhiej Zakońnikaŭ,

Iosif Kaluta,

Leanid Levanovič,

Michaił Michajevič.

Kiraŭniki niezaležnych ŚMI Respubliki Biełaruś:

Kirył Žyvałovič, hałoŭny redaktar «BiełHaziety»,

Vasil Zdaniuk, hałoŭny redaktar haziety «Svobodnyje novosti»,

Maryna Zołatava, hałoŭny redaktar partała TUT.BY,

Aksana Kołb, hałoŭny redaktar haziety «Novy čas»,

Iryna Leŭšyna, hałoŭny redaktar infarmacyjnaj kampanii BiełaPAN,

Alaksandr Starykievič, vydaviec internet-haziety «Salidarnaść»,

Iosif Siaredzič, hałoŭny redaktar haziety «Narodnaja Vola»,

Andrej Bastuniec, staršynia HA «Biełaruskaja asacyjacyja žurnalistaŭ».

• 0
• 0
• 0
• 0
• 0
• 0
• 0
• 0