U Salihorsku vynieśli prysud byłomu desantniku Rusłanu Akostku: try hady pazbaŭleńnia voli
Vyniesieny prysud pa kryminalnaj spravie Rusłana Akostki, byłoha desantnika, jaki 15 listapada zdoleŭ prajści amal praz uvieś Salihorsk ź bieł-čyrvona-biełym ściaham, piša spring96.org.
Jaho vinavacili u supracivie supracoŭniku milicyi, jaki achoŭvaje hramadski paradak, a taksama ŭ naniasieńni cialesnych paškodžańniaŭ, jakija nie panieśli za saboj ciažkich uskładnieńniaŭ i škody zdaroŭju. (art 363 KK RB). Da suda Akostka byŭ źmieščany pad vartu. Utrymlivaŭsia ŭ Žodzinskim SIZA.
Sudździa — Alesia Sieradzienka. Prakuror — Alaksiej Čarnyševič.
U sudovym pracesie byŭ dapytany Rusłan Akostka. Abvinavačvany vinu ŭ ździajśnieńni supracivu supracoŭniku milicyi z užyvańniem hvałtu nie pryznaŭ.
Paciarpieły supracoŭnik Salihorskaha RAUS Jahor Carykovič raspavioŭ pra toje, što nios słužbu pa achovie hramadskaha paradku. Zaŭvažyŭ chłopca ź bieł-čyrvona-biełym ściaham u rukach — Rusłana.
Carykovič padyšoŭ i paprasiŭ Rusłana syści z parku Čatyroch stychij, bo ŭ telehram-kanałach byli zakliki da niezakonnaha masavaha mierapryjemstva. Nie dačakaŭšysia dziejańniaŭ Rusłana, paprasiŭ pakazać pašpart. Pravieryŭ danyja i zapisaŭ sabie ŭ natatnik. Viarnuŭ pašpart, paśla čaho prapanavaŭ jamu prajści ŭ słužbovy aŭtamabil i prajechać u Salihorski RAUS.
Rusłan staŭ pytacca, u suviazi z čym, čamu i na jakoj padstavie jon pavinien ź im jechać.
Carykovič ža śćviardžaje, što adkaz byŭ dadzieny: «Dla dalejšaha razhladu». Ale Rusłan Akostka admoviŭsia prajści z supracoŭnikam.
Paśla hetaha Carykovič razam z kaleham uziali Rusłana pad ruki dla zatrymańnia, a jon pačaŭ akazvać supraciŭ:
— Rusłan schapiŭ adnoj rukoj za levuju nahu, druhoj rukoj za tułava i pavaliŭ mianie na ziamlu. Sam zvaliŭsia źvierchu, — raspaviadaje paciarpieły supracoŭnik RAUS.
Zatym Carykovič razam z kaleham uziali Rusłana pad ruki dla zatrymańnia, a jon nibyta pačaŭ akazvać supraciŭ.
Dapytali śviedak z boku abvinavačańnia i nieabyjakavych hramadzian, jakija prysutničali padčas incydentu i paźniej pahadzilisia davać pakazańni ŭ sudzie. Bolšaść śviedak nie bačyli momantu padzieńnia Rusłana Akostka na supracoŭnika RAUS.
Advakat i bok abvinavačvańnia vystupili ŭ sprečkach.
Dziaržabvinavaŭca Čarnyševič zapytaŭ 3 hady pazbaŭleńnia voli i pakryćcio maralnaj škody ŭ pamiery 2000 rubloŭ.
Advakat paprasiła apraŭdać z-za adsutnaści ŭ dziejańniach abvinavačanaha składu złačynstva.
Sudździa Alesia Sieradzienka ahučyła prysud: try hady pazbaŭleńnia voli ŭ kałonii ahulnaha režymu i materyjalnaja kampiensacyja ŭ pamiery 2000 rubloŭ.
Kamientary