Šrajbman: Łatušku, Capkałam i, mahčyma, Prakopjevu varta padumać pra šlach Navalnaha
Arciom Šrajbman parazvažaŭ u svaim telehram-kanale nakont viartańnia Alaksieja Navalnaha i paralelaŭ sa Śviatłanaj Cichanoŭskaj, jakoj niekatoryja internet-karystalniki taksama prapanujuć viarnucca.
Na jaho dumku, paraleli niekarektnyja, bo Navalny — palityk, jaki zmahajecca za ŭładu, a Cichanoŭskaja — simvał, avatar biełaruskaha pratestu, jakaja nikoli nie chacieła hetym pratestam kiravać i nie kiravała.
«Funkcyja Cichanoŭskaj — reprezientacyja biełaruskaha pratestu. Joj nie treba naroščvać svoj kapitał unutry krainy. Joj nikudy nie treba abiracca paśla sychodu hetaj ułady, joj nie patrebny rejtynh. Asabliva canoj pakidańnia dziaciej biez abodvuch baćkoŭ, mahčyma, na doŭhija miesiacy», — miarkuje jon.
«Sam jaje pryjezd i aryšt siońnia zdolnyja stać tryhieram pratestaŭ na niekalki dzion. Pa ŭsioj krainie vyjduć łancužki salidarnaści, suprać uładaŭ uzmocniać sankcyi. Ci pieraviesić heta jaje mižnarodnuju aktyŭnaść siońnia? Vielmi sumniavajusia. U hetym sensie jaje pryjezd byŭ by palotam kamikadze, ale navat nie ŭ varožy avijanosiec, a ŭ haru na varožaj terytoryi. Jarka i pryhoža, ale tupavata».
«A voś kamu možna padumać ab paŭtareńni šlachu Navalnaha — dyk heta tym biełaruskim emihrantam, chto choča zajmacca palitykaj u Biełarusi ŭ budučyni. Havorka pra Paŭła Łatušku, Valeryja abo Vieraniku Capkałaŭ, Volhu Kavalkovu, mahčyma, Vadzima Prakopjeva.
Ich mižnarodnaja «karyść» dla pratestu amal vyčarpanaja. Na sustrečy ź lidarami jeździć u asnoŭnym Cichanoŭskaja i jaje kamanda. Miedyjnaja prysutnaść astatnich emihrantaŭ chutka abmiažujecca ich błohami, jutub-kanałami i redkimi intervju.
Zdolnaść zapalić svaim słovam sercy biełarusaŭ na novyja pratesty padaje pa miery taho, jak biełarusy bačać, što im treba iści na maroz pad dubinki, a pałymianyja zakliki iduć ź ciopłych varšaŭskich ofisaŭ. ByPOL i inšyja cikavyja inicyjatyvy mohuć pracavać i biez palitykaŭ».
«Ich viartańnie i aryšt taksama b naŭrad ci padniali niejkuju pratesnuju chvalu, ale ŭ ich asabistym reziume heta mahło b stać surjoznym adkładzienym aktyvam. Takim ža, jaki ciapier nazapašvajecca ŭ Babaryki, Kaleśnikavaj i Cichanoŭskaha».
«Nie treba ŭsprymać hety dopis jak paradu. Nichto nie abaviazany ničym achviaravać, va ŭsich svajo žyćcio, zdaroŭje i siamja, jakija mohuć być važniejšyja za palityčnuju karjeru. Vierahodna, navat pavinny być. Post chutčej pra toje, što nie treba paraŭnoŭvać kisłaje z doŭhim i patrabavać ad Cichanoŭskaj taho, pad čym jana nikoli nie padpisvałasia», — reziumuje Arciom Šrajbman.
Ciapier čytajuć
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniaja ŭciečka była ŭ 2026-m, a zasnavalniki — rasijanie17
Kamientary