Łukašenka na pryjomie na Stary Novy hod: U 2020-m nam faktyčna abviaścili vajnu

Łukašenka skazaŭ, što sioleta jon jak nikoli rady sustrečy z haściami śviata. «Hety hod prymusiŭ usich nas pahladzieć na śviet i svajo miesca ŭ im vielmi šyroka raspluščanymi vačyma. Z adnaho boku, 2020-y nadzieŭ na nas maski, z druhoha boku — z kahości źniaŭ ich, sarvaŭ. My lepš daviedalisia pra adno adnaho. U kimści rasčaravalisia, na žal. A ŭ kimści znajšli aporu. My ŭbačyli biełarusaŭ, jakija ŭ vostry histaryčny momant zastalisia viernyja honaru i sumleńniu, što ŭ naš prahmatyčny viek asabliva kaštoŭna», — cytuje jaho słovy BiełTA.

Jon nahadaŭ, što jašče paru hadoŭ tamu ŭ hetaj zale jon papiaredžvaŭ, što biełaruskuju dziaržavu buduć sprabavać na zub: dastojna jana ci nie svajoj niezaležnaści.

«Čas pravieryŭ nas i daŭ adkaz: uvohule, vartyja. U 2020-m nam faktyčna abviaścili vajnu. I raźviazanaja jana była nie suprać prezidenta, dziaržsłužačych, siłavych struktur, a suprać mocnaj dziaržavy ŭ cełym. Dziaržavy, jakaja, niahledziačy na ścipłaje miesca na karcie śvietu, moža dazvolić sabie pravodzić niezaležnuju źniešniuju i ŭnutranuju palityku. Mienavita ŭ hetym pryčyna. Kali b my byli słabyja, z nami b razabralisia biez hetych padziej i biez vajny. Kali b my byli vielmi mocnymi, dapuścim, jak Kitaj, nam by nie vystaŭlali takija pretenzii. Choć i Kitaj chistali, dy jašče jak: pamiatajecie hankonhskija padziei?»

Jon zaŭvažyŭ, što suvierenitet krainy niemahčymy biez mocnaj ułady. «Heta vielmi važna ŭ toj momant, kali my ŭščylnuju padyšli da taho, kab pierarabić našu Kanstytucyju. A mocnaja ŭłada — heta nie adzin čałaviek. Heta nacyja, hatovaja zhurtavacca, kali dziaržava znachodzicca pad udaram. My vystajali (pakul vystajali), bo byli adzinyja ŭ imknieńni zachavać mir i histaryčnuju praŭdu, svoj układ žyćcia i mientalitet. Razhajdali, praŭda, nie adrazu. Ale razhajdalisia. Doŭha zaprahali — ciapier jedziem, — skazaŭ palityk. — Tamu abvieščany hod adzinstva — heta nie stolki zadača na budučyniu, jak nieabvieržny fakt i naš adkaz niadobrazyčliŭcam: biełarusy byli i buduć adzinym narodam».

Alaksandr Łukašenka ŭručyŭ ordeny, miedali i padziaki dziaržaŭnym dziejačam, artystam, supracoŭnikam srodkaŭ masavaj infarmacyi.

Ordenam Ajčyny II stupieni ŭznaharodžany Staršynia Kalehii Jeŭrazijskaj ekanamičnaj kamisii Michaił Miaśnikovič. Orden Ajčyny III stupieni atrymali staršynia Savieta Respubliki Natalla Kačanava i hubiernatar Hrodzienskaj vobłaści Uładzimir Karanik. Staršynia Nacyjanalnaha statystyčnaha kamiteta Ina Miadźviedzieva i ministr achovy zdaroŭja Dźmitryj Pinievič udastojeny ordena Pašany.

Miedalom «Za advahu» ŭznaharodžany śpiecyjalny karespandent telekanała STB Ryhor Azaronak, miedalom «Za pracoŭnyja zasłuhi» — «Savieckaj Biełarusii» Andrej Mukavozčyk i hałoŭny daradca pres-słužby prezidenta Valeryj Šulha, miedalom Francyska Skaryny — redaktar adździeła SB Dźmitryj Krat i śpiecyjalny karespandent telekanała ANT Ihar Tur.

• 0
• 0
• 0
• 0
• 0
• 0
• 0
• 0