Daniejka i Šviec abvierhli datyčnaść da stvareńnia prarasijskaj siły

Rasijskaje vydańnie The Insider apublikavała niekalki dakumientaŭ ź pierapiski načalnika ŭpraŭleńnia prezidenta Rasii pa mižrehijanalnych i kulturnych suviaziach z zamiežnymi krainami hienierała Słužby źniešniaj raźviedki RF Uładzimira Čarnova, jakija tyčacca Biełarusi. Ź ich vynikaje, što ŭ Kramli idzie praca ź biełaruskim «aktyvam» pa stvareńni novaj partyi z pracoŭnaj nazvaj «Prava naroda», jakaja budzie vystupać suprać Łukašenki, ale za intehracyju z Rasijaj.

Pavodle vydańnia, Maskva dla zachavańnia ŭpłyvu ŭ Biełarusi płanuje stvaryć sietku palityčnych lidaraŭ, struktur, resursnuju bazu i infarmacyjnuju sietku. U «aktyŭ» uvajšli staršynia praŭleńnia hramadskaha abjadnańnia padtrymki biznesu i pradprymalnictva «Sadziejničańnie i raźvićcio» Maksim Lavonienkaŭ, zasnavalnik hrupy kampanij «Fiermient» Valeryj Biastołkaŭ, staršynia savieta dyrektaraŭ «Farmłend» Ivan Łahavy, dyrektar «Centra ličbavaj transfarmacyi» Maksim Tarasievič, staršynia Respublikanskaha sajuza pramysłoŭcaŭ i pradprymalnikaŭ Alaksandr Šviec, suzasnavalnik biznes-škoły IPM Pavieł Daniejka. U artykule pryvodziacca vykazvańni hetych ekśpiertaŭ padčas kruhłaha stała ŭ rasijskim centry sacyjalna-kansiervatyŭnaj palityki.

— My sapraŭdy ŭdzielničali ŭ kruhłym stale CSKP u liku inšych. Cytaty, jakija prypisvajucca ž nam, vyrvanyja z kantekstu pierakručanyja, — skazaŭ Tut.by Alaksandr Šviec. — Ale my pravodzim masu ekśpiertnych kansultacyj štodnia. Takaja funkcyja RSPP, tym bolš što rasijski viektar abjektyŭna važny dla biznesu.

Pa jaho słovach, «ab palityčnych partyjach u budučyni havorka išła z rasiejskaha boku».

— Sapraŭdy, my zajmajemsia raspracoŭkaj prapanoŭ pa vychadzie Biełarusi sa składanaj situacyi — pierš za ŭsio z punktu hledžańnia sacyjalna-ekanamičnaj prablematyki i intaresaŭ našych členaŭ — pradstaŭnikoŭ pryvatnaha biznesu. Mahčyma, chtości vyrašyŭ skarystacca imi. Pryvatny siektar staŭ dastatkova ŭpłyvovaj siłaj u našym hramadstvie. Praz zaprašeńnie nas da ŭdziełu ŭ kansultacyjach rasijski bok sprabuje atrymać punkt hledžańnia hetaha siektara i zrazumieć, jak jaho ŭžyć u svaich metach. Ale RSPP pavodle statutu nie ŭdzielničaje ni ŭ jakich palityčnych partyjach. My svajoj pazicyi pa situacyi nie ŭtojvajem, pastajanna jaje aśviatlajem u ŚMI. Čarhovy płanavy raŭnd znosin z presaj zapłanavany na pačatak nastupnaha tydnia, tam budzie razhornuta dadziena pazicyja i napramki našaj dziejnaści na budučyniu, — adznačyŭ Alaksandr Šviec. Jon dadaŭ, što asabista ni z kim nie znajomy z Administracyi prezidenta Rasii.

Pavieł Daniejka taksama paćvierdziŭ tolki ŭdzieł u jakaści ekśpierta ŭ kruhłym stale Centra sacyjalna-kansiervatyŭnaj palityki ŭ farmacie videakanfierencyi. Pry hetym jon źniapraŭdziŭ infarmacyju, što abmiarkoŭvaŭ stvareńnie partyi i sustrakaŭsia z kim-niebudź z Administracyi prezidenta Rasii.

Apublikavany dakumient AP Rasii ab stratehii zachavańnia ŭpłyvu ŭ Biełarusi z ulikam niepapularnaści Łukašenki

• 0
• 0
• 0
• 0
• 0
• 0
• 0
• 0